■大大架巴士行過，快必都仲係叫路人衝紅燈。 fb片段截圖「慢慢走，勿亂跑，馬路如虎口......」亂過馬路有幾危險，細路仔都識唱啦，但「人民力量」嘅快必（譚得志）就為咗反對「一地兩檢」，攞市民條命嚟較飛，喺一條熙來攘往嘅馬路旁邊叫路人衝紅燈過馬路，成班小朋友喺度都唔識收口。唔少網民睇穿佢「講就威，做就跛」嘅本質，唔滿意佢做戲唔做足全套，無喺馬路中心講同一番說話。
死撐借違規抗「一地兩檢」
快必早兩日喺觀塘裕民坊一個燈位旁邊開街站，條馬路不時有車甚至係巴士高速駛過，亦都有唔少路人等緊過馬路，但佢一於少理，話「人民力量」要發起「紅公仔過馬路運動」，仲扯埋「一地兩檢」嚟講，「你睇到無車，而快捷同埋方便，你就可以破壞法律㗎啦，呢個係高鐵（『一地兩檢』）話畀我哋知嘅，唔係我教你嘅，呢個係政府教我哋嘅！」
雖然講完呢句佢立即戴返頭盔，話「你知我掉轉緊啲嘢嚟講啦」，自己只係講笑，但當有路人曳曳衝紅燈嘅時候，佢又唔收口嘞：「啱呀，紅燈過馬路，快啲快啲，唔使守交通規則㗎，高鐵（『一地兩檢』）都係咁㗎，唔怕㗎，最緊要方便快捷，可以破壞法律㗎！」
快必仲喺條街度大大聲講低自己手機號碼，叫衝紅燈嘅路人如果俾人告，可以搵佢上庭做證人，又好囂屎咁話自己個faecebook直播已經記錄晒佢煽動他人犯法，「警察又可以預約拘捕我嘞！」
網民寸「精人出口」得把口
唔少網民唔抵得快必周街叫人衝紅燈，有啲就覺得佢齋講唔自己一齊做埋，好似「Yiu Fai Wong」就話：「快必，點解你自己喺紅燈嘅時候唔走嚟走去，咪又用精人出口呢招。」
「Ryan Poon」就叫佢喺路中心開街站先好講嘢，「或者去將軍澳環保大道路中心講，嗰頭近你呀」，唔知係咪因為環保大道通去堆填區呢？■香港文匯報記者 陳庭佳
網民鬧爆快必
Ryan Poon：快必，請你站在路中心再講嘢啦！或者去將軍澳環保大道路中心講，嗰頭近你呀。
Paddy Lee：叫人衝？點解佢自己唔衝呀？大家睇清楚呢啲畜牲嘅行為啦，一味叫其他人去犯法，自己坐享其成。
Pphilip Wong：通常這些搞事者，不會叫家人（太太，仔女，兄弟姊妹）去搞事的，只會誘惑他人！......牽頭人士，只負責牽頭，後果/結果要參與人士自負！走得甩，你好彩，累積人氣；走唔甩，你擋災，也有同情分加！
Waiyin Luk：反對派真係好事唔做壞事盡做，叫人行車時段亂過馬路，如有（人）被車撞到，呢個責任及損傷他們會負責嗎？
Nai-leung Chow：違法，教唆人違法，有證有據。拉人呢（啦）！
Mingming Liu：高鐵（「一地兩檢」）你覺得違憲又可以向法院提出司法程序，何必搞亂香港，證明呢班口口聲聲話維護法治是香港核心價值嘅垃圾，最唔尊重法治。
資料來源：fb留言 整理：香港文匯報記者 陳庭佳