■立法會最快下月處理針對鄭松泰倒插國旗區旗嘅譴責議案。香港文匯報記者梁祖彝 攝「熱狗」主席蟲泰（鄭松泰）倒插國旗區旗搞到一身蟻，立法會最快會喺下個月處理針對佢嘅譴責議案，如果有三分二以上嘅議員支持，咁佢就要同立法會講聲「Sayonara」嘞。雖然仲喺議會佔超過三分一嘅反對派當中，有唔少議員話會保佢，但同「新民主同盟」咖喱飯（范國威）老友鬼鬼嘅教協監事韓連山就「溫馨提示」，話只要有5個反對派議員缺席，譴責議案就會通過，動機係乜？唔使畫公仔畫出腸啦！■香港文匯報記者 陳庭佳
韓連山噚日喺facebook出嘅po（帖文），個背景陰陰濕濕咁，但都唔夠內容咁「毒」到。佢話蟲泰呢鋪都算危危乎，因為只要有5個反對派議員缺席，譴責議案就會通過。唔知咖喱飯會唔會聽老友話，到時辯論嗰陣話食個飯、見個客或者落個區就走咗去呢？而佢其他「議會陣線」拍檔又會唔會跟風呢？尤其區諾軒一直同蟲泰唔多啱，仲公開鬧過對方收皮！
「人社」粉乘機雪舊恨
同時，喺「人社」（「人民力量」同社民連）支持者集散地、fb群組「花生當飯食，我地最積極」度，亦都有唔少方丈仲記得「熱狗」同「人社」啲牙齒印，叫反對派借啲意送蟲泰一程。
好似「Hung Chan」就叫反對派唔好自作多情，「鄭議員1比69咁英明神武使×你救咩，人哋無要求你幫手自己衝埋去抽水搶光環，『熱血』參選就係為咗辭職嘛，『泛民』唔好阻住晒啦。」
「Toni Chan」 就不滿「熱狗」次次選舉都寸反對派選民含淚投票，仲用呢樣嘢嚟鎅票，「點解『泛民派』今次又要含×投反對票保住呢條契弟狗呢？我真係百分百贊成佢哋由得『保皇黨』劏×咗呢隻狗！『熱狗』係唔會知恩圖報嘅！只會繼續搵機會咬你春袋！」
「William Ng」「和理非」上身：「單是『熱血公民』在過去5年鼓吹勇武暴力這一點已經要譴責，我都唔明班飯糰保這個賤人為乜？??家有十幾友因勇武在監獄坐緊呀！你唔譴責『熱血公民』為佢哋抱不平，仲話要出席保佢，有冇搞錯呀！」