做政治人物，事實都未搞清楚，就亂將網上訊息廣傳，反映咗呢啲人嘅質素有幾「高」。話說前晚香港電影金像獎頒獎禮，到演員黃秋生講嘢，《蘋果日報》就將一堆佢冇講過嘅說話塞落囮滮f度，結果好多睇《蘋果》做人嘅台灣報紙中晒招，香港幾個政界人物都中招，包括「香港眾志」嘅河童（黃之鋒）。
腦補嘉賓「感想」 散播仇恨言論
話說黃秋生擔任最佳編劇獎的頒獎嘉賓，《蘋果日報》即時新聞喺報道佢說話時，喺中間插咗一段撰稿人自己嘅「感想」，內容係寸身為政協委員嘅成龍講過「香港電影也是中國電影」呢一句，話「依（𠵱）個人今（前）晚出席香港電影金像獎。唔知佢代表緊中國電影，定香港電影？」
呢段說話接住喺黃秋生講嘅嘢嘅末段，而接住嗰一句正正係「黃秋生講完後，台下一片靜默」，咁係人都會以為成段都係黃秋生講，好多台灣報章都照抄。香港唔少政治人物，包括河童、「新民主同盟」嘅范國威、工黨嘅何秀蘭，都當呢句話係黃秋生講嘅，猛咁圍爐話黃秋生敢言喎。
黃秋生嘅政治立場係點相信好多人都知，但冇講過就係冇講過囉！唔少睇直播嘅網民，都話黃秋生根本無講過呢段嘢。「何明基」就批評：「編輯公器私用，利用傳媒平台，宣揚散播仇恨，最衰香港多傻仔，有市場。」
「Yip Wai Tung」也道：「好心啦蘋果，你自己腦補最尾一段，人地（哋）黃秋生無提到成龍喎，唔好咁誤導啦，俾你呃到click rate又如何？」
正所謂跟車太貼，河童就俾人寸爆。「Truman Chan」話：「呢段唔係佢講架（㗎）喎，只係蘋果記者自己嘅想法，打少d（啲）飛機啦之鋒！」
「Becky Mok」也揶揄：「連黃之鋒都領蘋果嘢比（俾）蘋果跣獲（鑊）金（甘）！喂細路，睇live啦！後面嗰句係蘋果自己加上去架（㗎），唔係黃秋生講！」「Samuel Miu」亦話：「普通網民share比（畀）like我唔會怪啦，但好多係知名人士，立法會議員，上市公司都亂咁嚟，係咪離譜呢？」
咖喱即刪帖 河童急改文
《蘋果》後來先鬼鬼祟祟將呢段撰稿人嘅「感想」放最尾，前面仲加左虛線。何秀蘭就喺fb道咗歉，但河童知道「領嘢」後，做法一樣咁鬼祟，就係靜雞雞將原帖中嘅開刪引號改咗位置，只括住前半段，但編輯過嘅帖係有記錄，呃唔到人囉！不過，佢就好過咖喱飯少少：咖喱飯連帖都刪埋，當冇事發生過，真係新一代從政者嘅「典範」！
當事人批 以訛傳訛
黃秋生深夜在fb發聲明，指有人將該段說話强加諸他口中，「講詞已先發給大會準備，大家可以查証，至於現場亦有錄像，大家也可翻看。及至有人說錄像已被删改，這是沒有的事，現場幾千人亦可作証。可嘆的是，不足幾小時內，網上傳媒竟然以訛傳訛，自由解讀，甚而加添，互傳一段從不存在的片段，演變成一段活生生的曼德拉效應。」
他強調說：「我雖不才，亦不會在一個高興而又嚴肅的場合對前輩作出如斯侮辱，......雖不殺伯仁，伯仁由我而死，在這裡需向成龍大哥道歉，禮也。」
黃秋生又不點名批評「某網媒」，「用第一身表述，說得好像在現場親眼目睹似的。」他更對某「網咖」將他的一番話拉到「港獨」去，「居心惡毒」，「我的政治觀點其實多年來已經講過多次，我並不支持或相信『港獨』，由是推論，從任何角度可知，香港是中國的國土，保衛釣魚台我也去過，這點是不用置疑的。」■香港文匯報記者 陳川