特區政府一向都會觀察議員開會，去了解法案審議情況，但民主黨議員許智峯就忽然無知又忽然「英勇」，突然不滿被「偷私隱」，走去搶女EO（行政主任）嘅手機，網民點睇？一般網民都鬧爆佢嘅幼稚小學雞行為，寸佢自己搶人手機再偷睇，明目張膽侵犯人哋私隱仲惡人先告狀，希望佢留案底咁話。激進派都頂唔順呢種蝦女EO當「抗爭」嘅手法，仲要對住傳媒認晒自己嘅罪行，咁即係聽DQ（取消資格）啦。
被譏「膠到似假新聞」
議員搶女EO手機再匿入男廁等對方冇得搶，小學雞到咁嘅程度，唔少人一睇都懷疑係咪真有此事，fb專頁「無神論者的巴別塔」都揶揄話「膠到似假新聞」，仲開post（帖文）問︰「當一個痴漢搶咗個女仔部手機衝入男廁，你估佢會對部電話做咩？」「巴別塔」又火力大開，話呢種「抗爭手法」非常符合「爛鴿黨」，就等警察處理，「還（橫）掂（民主黨議員）林卓廷都有講：沒有任何議會抗爭能夠凌駕響法律之上丫（呀）嘛！不過成件事最×都係，做到咁低賤，最尾立法會都係一樣無流會......」
激進派就一個二個跟住鬧爆許智峯嘅小學雞抗爭。「Sunny Kan」狠批︰「×佢老×走去恰一個冇權既（嘅）EO仔就當係抗爭呀？又話和理非既（嘅）？哦呢D（啲）就唔係暴力？」「Kinson Yuen」話︰「好××的抗爭手法。即管睇下幾時會使出議員喺議會集體瀨屎呢招（結果依然係流唔到會）。」
向傳媒認罪等DQ
仲有班激進派就恥笑佢小學雞完仲畫晒押咁。「Tsang W. K. Charles」就問︰「認左（咗）『取走』人哋部手機，如果到時告上法庭，是否冇得打？」唔少反對派都擔心佢咁樣搞一搞，坐監留案底即係又DQ，「James Lo」就奉勸佢收檔︰「白痴到咁做議員？今次『泛民』比（俾）你累死啦，下屆唔好選啦唔該，做實事唔係做×事呀唔該！」「Wan ChaiChai」就乘機抽秤成日叫人含淚投票嘅傳統反對派︰「選佢入去，有冇覺得自己好失敗？」
更多嘅網民係鬧爆佢搶嘢加偷睇。「Kelvin Chan」質問︰「許生你憑什麼權力查看他人的電話？」「Ericjohn Lee」亦話︰「就算我係黃絲，都好難認同許議員的做法，點可以搶人手機，睇裡邊D（啲）野（嘢）？」「Hugo Leung」指出︰「（民主黨主席）胡志偉都不認同許智峰（峯）惡行。」
有網民就直踩佢話被收集「私隱」嘅講法低能。「Lemon Chow」反問︰「身為公職人員，返緊工唔容許政府及公眾知道你嘅行蹤？」「Joseph Li」亦話︰「記錄議員出席情況係私隱？有病唔該睇醫生。」 ■香港文匯報記者 甘瑜
