前排「勇奪」女EO（行政主任）手機嘅民主黨許智峯，大大聲話自己只係「保障議員私隱」，所以先主動同政府人員「抗衡」，可惜民主黨同激進派都頂唔順呢種蝦女EO當「抗爭」嘅手法，為求自保仲同許智峯光速「割席」。有網民就話，許智峯未至於「眾叛親離」，因為佢仲有一班思想行為同佢一樣咁幼稚嘅「同行者」，企圖靠不斷示威嘅方式，幫許智峯戴返個「民選天命之人」嘅光環，但許智峯咁有性格，點會稀罕同佢班「傾慕者」同行呢？
今次許智峯事件真係一面「照妖鏡」，部分仲有基本道德嘅反對派議員知道許智峯太過不智，選擇「唔出聲當幫忙」，好似經常就唔同事件「說三道四」嘅林卓廷今次都變咗「鵪鶉」，相反一向都「未討論先激動」嘅河童（黃之鋒）、長毛（梁國雄）、黃浩銘及岑傲暉等人，可能因為大家都唔識寫個「恥」字，所以即刻拉起「與許智峯同行」嘅橫額，上街示威盲撐許智峯。
好多網民都唔明點解佢哋仲要做許智「瘋」嘅「同行者」，fb專頁「無神論者的巴別塔」都特登開post（帖文）話睇唔透︰「與許智峯同行做乜？同行一齊搶電話、然後拎電話走入公廁竊取他人資料？定係只要佢係立法會職員，私隱就老奉比（俾）你地（哋）齊齊侵犯？其實呢班友究竟知唔知而（𠵱）家邊個係加害者、邊個係受害者？與加害者同行？傻×咗？」
佢強調，今次「峯搶手機」事件並唔同過往抗爭，許智峯並唔係響任何壓力之下被迫犯事，而佢自己甚至民主黨都真誠相信自己做錯事，咁樣都仲「同行」，唔係包庇係乜？
但當事人係咪想同佢哋一齊峯言「瘋」語？心水清嘅網民「Max Lam」就話，「許智峯呢？去咗邊？而（𠵱）家人地（哋）都唔想同你同行呀！」「KaYun」就一句道破：「根本係一廂情願！」「Harry Chiu」就揶揄話「咁鐘（鍾）意撐，撑許智峯搶女人嘢入男廁自high喇！」「林方」就為其他反對派擔心，話「『泛民』與搶女人野（嘢）走入男廁嘅搶劫賊變態佬許智峯同在！」「Liu Mo」就發溫馨提示，「民主黨的（啲）女小心喇！一陣許智峯話搵你練習抗爭，又攬又摸都仲得呀！」 ■香港文匯報記者 鄭治祖