「轉身遞封求情信先！」啊，係3封求情信先啱。之前仲口響響話自己唔會求情嘅「青症雙邪」之一嘅Cheap禎（游蕙禎），噚日賣甩黨友的士梁（梁頌恆）一次過遞咗3封求情信咁多，舉動之肉酸真係令人不忍直視，仲搞到的士梁姑姐喺庭外發難，鬧Cheap禎反口𠻹。有網民就揶揄同的士梁有曖昧嘅吽J「真的夫妻有如同林鳥？大難臨頭各自飛？應驗了。」
的士梁被賣豬仔 姑姐狂鬧
之前大大聲話唔會求情，仲狠話放到世界盡頭咁講「只有做錯事嘅人先會求情」，結果大大個回力鏢掟返埋自己塊面度，唔止自己寫咗封求情信「賣小強」（扮弱小博同情），仲搵埋中學老師同社運人士幫手寫，你話冇預謀都冇人信啦。
的士梁係咪俾Cheap禎賣豬仔，佢自己就無講，但肯定佢姑姐就唔知情啦。有媒體噚日就報道庭外情況，話的士梁個姑姐喺庭外發難，鬧Cheap禎明明講好咗唔求情，但結果反口，質疑佢係「泛民嘅人」喺度攪局喎。咁耐人尋味嘅講法，向來視佢哋為「鬼」嘅反對派中人就留言質疑︰「即係乜？梁（頌恆）是建制派呀？」
「點威點威 原來又跪低」
不過，更多人嘅反應係恥笑Cheap禎昨日攞彩、今日跪低。網民「Po Tai Yeung」寸爆話︰「點威點威，原來又跪低！」「Chiman Lau」就諷刺道︰「都唔係型到最後，真係好失望。」「Pang Kwok-kin」直言︰「先大叫不求情，博『黃屍（絲）』掌聲，然後細細聲求情。」
「Peter Ng」表示︰「當日意氣風發，今天搖尾乞憐，如果不給予教訓，牠（她）永遠不會成長。」
唔少網民都話Cheap禎之流反口好平常。「Jonas Cheung」話︰「反口，無恥，這些是常識吧？」「David Lam」亦話︰「從來都係反口覆舌㗎啦！咁×巴閉唔好求情呀嘛！」「Cham Lim」表示︰「牠（他）們這種『泛民』、『港獨』流氓，出爾反爾亦不是第一次而是經常性出現的陋習，但可惜是香港選民的低智質差才導致牠（他）們有機會當選！」
求情代表有錯 「摑邪恆一巴」
咁樣求情應唔應該有用呢？「Lee Lee」認為，既然Cheap禎都覺得自己有錯，應該重判啦︰「求情即是代表自己有錯，錯就要認，打就要企定！」「Tim Yu」亦寸Cheap禎異想天開︰「呀！求判社會服務令？不如求情無數或無罪再獲堂費啦！」
「Leung Hing」就以「哲學問題」反問︰「佢兩個明明係同一樣身份（一樣係不被承認的垃圾已完），做同一樣行為，點解會一個知錯，另一個就話自己冇錯呢？係邊個打邊個一巴掌呢？」
不過遞完求情信，Cheap禎即刻戴返頭盔，喺fb度引用屈原嘅《離騷》，又話自己無悔喎（圖）。真係想有悔意又得，彈弓手收返悔意都得。
港區全國人大代表陳曼琪就喺fb出文慨嘆︰「屈原《離騷》是表達愛國愛民的情懷。如屈原知道現代人這樣引用他的作品，他有什麼感覺呢？」 ■香港文匯報記者 甘瑜