■謝霆鋒香港文匯報訊 已經落實為內地爆紅歌唱節目、浙江衛視《中國新歌聲》第三季擔任導師的謝霆鋒，前日現身北京鳥巢為節目拍攝導師宣傳短片。
宣傳片講述霆鋒揸住節目組架「試音大貨車」去北京地標鳥巢兜圈，素人選手可以自由上車唱歌畀霆鋒聽，如果霆鋒覺得唱得好，就可以發直通卡，邀請對方參加現場錄影。話就話拍宣傳片，不過其實現場真係有素人走上貨車唱歌畀霆鋒聽，日前香港一號風球又落雨，北京就剛好相反，曬到爆炸之餘，氣溫仲高達41度，不過霆鋒都好有耐性好認真咁聽晒所有素人選手唱完，唔係因為拍宣傳片，拍完幾個鏡頭就算。
呢頭認真聽，轉個頭霆鋒突然「Chef LeMon」上身。高溫之下，本來着住紅色格仔衫的霆鋒都忍唔住要脫，太陽曬到地面同車都勁辣手，呢個時候，霆鋒行到車頭用手摸吓車頭熱度，然後就露出一副好滿意的表情同工作人員講：「想要個雞蛋！」之後仲做了個煎蛋的動作，即席在引擎蓋上表演「鋒味煎蛋」，睇到現場的人拍手大笑。