■新郎石耀庭台上爆喊。香港文匯報訊 薛家燕前晚榮升奶奶，其二仔石耀庭（Jackson）與女友陳素怡(Zoe)舉行婚禮。婚宴期間，七公主其中四位連埋家燕姐齊齊上台，向一對新人及家燕姐講恭賀說話，五公主更感動到眼濕濕。馮素波第一時間給咪沈芝華，對方一直很害羞，之後就謂：「祝新郎、新娘百年好合，出年生！」家燕姐即笑謂：「生BB！講埋生BB先！」陳寶珠更笑不攏嘴！新抱Zoe畀足二百分奶奶家燕姐，而Jackson多謝媽媽家燕姐同岳父岳母的養育之恩，仲講到喊，好感動！
家燕姐囝囝石耀庭的婚宴開始了！一對新人在台上祝酒，當然唔少得多謝媽媽家燕姐同岳父岳母的養育之恩，仲講到喊，好感動，不過家燕姐上台講嘢，更加感人，講講吓，家燕姐都忍唔住眼淚。石耀庭同老婆Zoe在賓客的歡呼同掌聲中步入會場，上台後，司儀林盛斌就叫一對新人同大家分享吓感受，石耀庭雖然一早準備了貓紙，不過講到老婆的好，媽咪的養育之恩，就忍唔住爆喊，要老婆幫手抹眼淚，忍住淚的他說：「我們終於結婚了，我愛你，能夠認識你，好似搵到我人生的一塊砌圖......」又忍唔住喊，然後多謝岳父岳母養育了一個咁乖巧的女，仲當眾同岳父講，會做一個負責任的丈夫，好好照顧老婆，叫岳父放心。而Zoe就話老公求婚之後，從來未見過佢咁努力，去籌備婚禮，「我有時發脾氣，佢包容，忍得好多，好難得搵一個咁將就我脾氣的人，佢同我成日講一句，你揀啦揀啦，你想嘅我一定幫你實現！」
講到奶奶家燕姐，「難得識到一個有傾有講，一齊相處的奶奶，她真的好疼我，佢成日同人講，畀我一百分，今晚（前晚）我想要畀返佢二百分！」二人下台送花畀家燕姐，三個人攬埋一堆，好溫馨，當然仲有送花畀岳父母啦！
家燕姐喊完再喊
輪到家燕姐上台，佢開心地說：「今天（前天）我係好開心，七點就起身，今日（前天）係我期待的一天，大家都係大忙人，好多謝大家出席我今日......哈哈，我個仔的婚禮，最近我成日講錯，哈哈......今日（前天）在座好多朋友都睇住我嘅仔女長大，大家都知廿幾年前，我啲仔女好細嘅時候，那段日子，我比較唔係咁平坦，擔心點樣養大佢哋呢？得嗰幾歲，又擔心，自己紅得幾耐呢？可能紅得兩年就冇嘢做喎，一路好有壓力，好彩呢，我有份衝勁，肯去做，仲有我三個仔女好聽話，好難得，我好感恩，在座好多影視界朋友都是我恩人，冇你哋愛戴，我三個仔女冇咁順風順水去行，我那時諗，我點送到佢地去讀大學呢？仲有多謝大家，我趕幾組又遲到，大家都好包涵，去寬容接納我，啟發我引導我，可以讓Jackson留學，學成歸來，事業有成，仲可以成家立室。」之後家燕姐忍不住哭，表示自己真係好開心，因為期待呢個日子好耐，唔好意思，剛才在下面仲諗住自己唔會咁哭。然後，又到睇住Jackson大的七公主之四位公主上台，馮素波、沈芝華、陳寶珠同王愛明就輪流恭賀家燕姐，沈芝華話：「百年好合，出年生......（生Ｂ）」寶珠姐就說：「睇到家燕的仔成家立室，雖然辛苦啲，值得恭賀，祝福一對新人永結同心，孝順父母，快些生B畀家燕，佢好恨。」馮素波同王愛明亦送上祝福。
吳業坤唱歌助興
吳業坤前晚去了「緋聞女友」薛家燕娶新抱的飲宴，他笑言因在場有太多前輩，所以不敢亂講嘢，但很戥家燕姐開心：「見到佢好感動，而且之前同佢拍劇，佢都會講好多故事畀我聽，例如嗰陣點樣有機會做《真情》，見到有咁多朋友祝福佢，我都希望70歲的時候大家會畀面我。」他亦表示有唱歌助興：「家燕姐叫我唱，我唱咗《分分鐘需要你》。」