繼民主黨有釘書健（林子健）疑似攞釘書機自殘大髀，再開記招聲稱自己喺旺角鬧市俾內地執法人員「擄走」後，「中箭（香港眾志）」今次仲醒，冇人證冇物證「死無對證」嘅情況下，話曾經有兩個成員喺內地俾國安扣查喎，佢哋仲話，唔露面唔披露細節係要保護兩個成員嘅私隱同安全。有網民直言「單嘢好假」，亦有人留言話︰「作文都要有圖，名都冇，你講乜都得啦！」
今時今日想話俾國安拉，原來已經連人證物證都唔使，「中箭」羅三七（羅冠聰）加河童（黃之鋒）再加埋個新主席林朗彥「講咗就係」。不過，話成員被扣查，又講唔出細節；話要公開件事，又唔肯講件事內容；話要保護兩個成員，又將佢哋嘅經歷擺上枱，真真假假咁，網民都聽到成頭問號。
「Keith Lau」冇佢哋咁好氣咁話︰「單野（嘢）好假。」「Ken Leung」質疑︰「當事人不在席上？欠缺說服力。」
被寸仿釘書健自殘
唔少人都諗返釘書健單嘢。「Kelvin Cheung」直言︰「又黎（嚟）玩釘書釘事件？要唔要比（畀）個魚柳包你地（哋）？」「Penny Yu」亦問︰「三月唔講，八月先講？唔通又做釘書健？」
疑刷存在感博區選
亦有好多人質疑「中箭」只係想刷下存在感。「Kei Wong」話︰「『香港中箭』間中要攪（搞）D（啲）新聞，保認知度。」「Oscar Lee」認為︰「好耐冇見報了，區議會選舉前專登上大陸（內地）博拉。求仁得仁。」
有人就認為，就算國安真係扣查「中箭」都好合理，「Popopat Kwok」就話︰「如果班友仔去美國加洲（州）大叫加洲（州）獨立，或到馬德里支持加泰獨立，人家會點招呼佢班『高智』？」
反對派趁機又抽高鐵水
無啦啦開個咁嘅記招，講到一嚿嚿咁，大家都唔知佢哋所為何事，但反對派班人就好識補位嘞，例如有意參加立法會九西補選嘅小麗老千（劉小麗）同公民黨譚文豪等，聽到深圳高鐵站、廣州火車站係「事發地點」，就即刻話遲啲高鐵通車就會喺香港發生喎。「Stanley Chan」就留言秒殺︰「驚咪唔好去西九站囉！」 ■香港文匯報記者 甘瑜