有網民改圖寸小麗老千推啲義工去死。 fb圖片若要人不知，唔好太低B！日前民建聯好多張掛喺土瓜灣街頭嘅橫額，都俾人黐咗海報喺上面，一睇內容就知好大機會係反對派中人所為。果然，當「兇手」日前又再出動嘅時候，就俾警方當場斷正，而佢更加係有意出選立法會九龍西補選嘅小麗老千（劉小麗）個義工！「兇手」一早俾人踢爆裝備充足，唔似單獨行事，之但係小麗老千依然死撐自己唔知情。有網民就認為，義工幫佢手抹黑對手俾人周到，小麗老千就即刻耍手擰頭扮無知，果然係老千！ ■香港文匯報記者 陳庭佳
民建聯九龍城區議員關浩洋日前喺facebook踢爆，有個阿嬋夜媽媽幫民建聯啲橫額「敷Mask（面膜）」，黐咗啲海報上去，內容係不滿佢哋唔支持立法會引用特權法查港鐵沙中線工程問題，仲提到個阿嬋架買餸車放滿晒海報，啲海報仲要係全彩色、背後全幅貼紙，都幾重本吓，質疑對方係受人指使。關浩洋之後報警處理。
落本黐海報 跟貼「小麗」車
警方前日以涉嫌刑事毀壞拉咗一個59歲、叫陳×娟嘅女子，據了解，佢就係關浩洋前幾晚發現嗰個阿嬋，而當時佢又再出動，將啲海報黐喺民建聯橫額上面，俾巡警斷正。
小麗老千之後回覆傳媒查詢時就承認，個阿嬋係「傘後」組織義工，亦都有幫過佢檔「小麗民主教室」，不過就死撐自己對呢單嘢「毫不知情」，而海報亦都唔係以「小麗民主教室」或者佢個人名義印刷。
雖然死口唔認關自己事，但佢話已經聯絡個阿嬋同提供協助喎。
死撐「不知情」 請槍食死貓
又會咁啱嘅？小麗老千近日亦都喺土瓜灣等多區收集市民簽名，要求立法會引用特權法查沙中線問題，同黐喺民建聯橫額上面啲海報同一口徑喎。
不過，佢話自己「從不鼓勵」義工作非法行為同滋擾任何人喎。
小麗老千易潔鑊上身，網民慨嘆阿嬋硬食成隻死貓。「Tammy Kw」話：「死蠢，聽唔聽到呀，有事冇人撐你㗎！自己負責喇！」「Cloud Wong」重申「精人出口笨人出手」呢個大道理，「黃敬」就擰晒頭：「幾十歲人做埋啲損人不利己的事，讓你後人都無法抬頭。再說你幫劉小麗，等你出了事，她卻推得一乾二淨。阿婆，擦亮你的眼睛吧！」
網民破「盲腸」 「不鼓勵」即默許？
有人就直指小麗老千點兜都兜唔到，「Cheong Siu Chong」話：「劉小麗不鼓勵其義工作非法行為，不鼓勵即做也無妨的意思，適逢七月節，鬼拍小麗老千後尾枕。」「黎家源」亦都質疑：「唔鼓勵又提供協助？我好亂呀！」
「Roger Lui」強調一定要拉小麗老千呢個幕後主腦，「Roxy Kwan」就認為反對派乜事都夠膽做，除咗好事，「呢種議員多一個，香港死快啲！」
若要人不知，除咗唔好太低B之外，受害者民建聯亦都同大家講「唔好周圍黐」，噚日喺facebook登咗幅改圖，提醒市民唔好以身試法。
不過最重要都係「除非己莫為」，要玩補選就用工作同政綱說服選民，好過搞埋晒啲小動作啦！