鴿黨（民主黨）個大埔區議員區鎮樺早前違泊遇到警察，兩次警告佢都唔走，最終俾人抄牌後就上網公審個警察，話對方「冇禮貌」，仲好得戚咁話自己即場call咗人哋上司嚟「了解情況」，之後仲打算逐級投訴𠻹，奇葩思維引起網民連日圍插，刪極留言都仲有網民鬧佢。事隔3天，佢終於跪低認錯，話自己「誠懇」向「公眾致歉」喎。唔少網民都鬧佢講到尾都冇向受影響嘅警員道歉，仲繼續暗示警察「唔尊重」佢，所謂嘅「誠懇致歉」，根本係想保住個區議員位先扮死狗。就咁樣，佢又成功製造咗個「關公核彈」，又俾網民圍插多鑊。
要鴿黨啲人認認真真道個歉係咪咁難呢？無論係立法會議員許智峯搶女EO手機，定係大埔區議員區鎮樺違泊被抄牌再公審警察，佢哋都只係話「向公眾致歉」，好似事件入面真正受影響嘅人唔係人咁。
「大包圍」晒冧 拒向涉事警道歉
話說區鎮樺上星期六喺facebook出文，話自己違泊時俾警察叫佢走，第一次唔應人，第二次就寸寸貢咁話「我地（哋）啱啱做完嘢出嚟喎」。之後警察梗係抄牌，區鎮樺就指責對方「冇禮貌」，即場「報警投訴個警員，要求佢上司到場」。佢仲聲言，自己今個星期一開始就會「由下而上，逐級逐級打比（畀）佢D（啲）上司投訴」。
惡人先告狀到咁，正常人都睇唔過眼啦，唔少網民都留言鬧爆佢嘅劣行，唔少人質疑佢濫用特權𠻹。俾人鬧咗3日3夜之後，佢噚日就出道歉聲明，話為自己違泊不當、處理不當、用詞同語氣過火，「誠懇致歉」喎。
回馬槍插警 跌落地揦番拃沙
佢又聲稱，自己冇濫用議員身份、冇用特權，而自己「一向重視警民合作」，再放咗個重點喺最後話「期望公職人員在執行職務期間與市民互相尊重。」
誠唔誠懇呢，就唔係你講嘅，而係一般人看在眼裡感唔感受到囉。咁當然多數網民都感受唔到佢嘅歉意啦。排頭位留言嘅「Chung Yu Sze」狠批︰「引咎辭職啦！區已完！前日就不知所謂既（嘅）氣燄（焰），今日就勢色唔對扮死狗！」「陳耀文」直指︰「你到而（𠵱）家仲未知錯呀！喺第四點嘅字裏（裡）行間仍暗示當日個警員無尊重你呀！咁叫道歉？」
睇風頭扮狗 網民促引咎辭職
「Kam Fung Chan」質問︰「致歉？同邊個致歉？堂堂一個議員連道歉信都唔識寫？當日阿區生你囂張跋扈開埋警員號碼玩公審，咁道歉信連一粒號碼都無講？Ok就算唔講號碼，Sorry Sir你唔會唔識串啩？」
「Yip Tung」進一步追問︰「你由下而上，逐級逐級打比（畀）人道歉未阿（呀）？你話人無禮貌個（嗰）時就tag人地（哋）個編號出嚟，宜（𠵱）家比（俾）人話返無禮貌，就隻字不提，咁叫有心道歉？」
唔少網民繼續質疑佢濫權，要求佢交代當日點樣叫人哋上司去現場了解事件。「Andy Tang」分析︰「如果你冇濫用議員身份，請問你係打咩電話call人上司到場？點解唔照正常程序打去投訴科？」「Wallace Wong」就假設佢係打999，但認為咁樣都係濫用，「濫用職權繞過投訴警察科（課），又大支野（嘢）咁直接跨區搵沙田警區指揮官。」
「Jav Lau」就長文怒斥︰「做人唔好看（有）風使盡利（??），做議員唔係必然嘅，今朝有『黃屍（絲）狗』撐就你好彩做到！警察都係打份工，同你一×樣，唯（惟）獨對警察不公平就因為有個投訴科，被啲賤民隨意挑釁警察再去投訴，你班議員就好×彩，無監無管！......重視警民合作？你班民煮（主）亂黨對警方的態度自己心照......你的所作所為好明顯證明你班亂黨對警察的態度，就是以挑釁來達到攻擊警方目的，再公佈天下就是刺激『黃屍（絲）狗』來達到反警察、反社會的目的。」 ■香港文匯報記者 甘瑜