■周庭死纏區諾軒，帶日本師生團參觀立法會。俾人DQ咗冇得選立法會，咁有咩做？咪就係黐住自己個Plan B去唱衰香港立法會囉。「香港眾志」周庭前晚喺facebook出文，話自己同立法會議員區諾軒帶日本大學生「參觀」立法會，去到介紹立法會主席工作嘅時候，就係咁唱衰梁君彥濫權喎。有別於周庭唱衰人後仲擺上網講到大大聲，負責帶團同講解嘅區諾軒就一隻字都冇喺自己fb提過，唔知係咪之前俾人質疑佢同鼓吹「獨立」嘅日本政客往來，𠵱家連帶日本人嚟睇立法會都唔敢講呢？
死纏區軒「搶fo」 抹黑君彥媚外
冇得參選嘅周庭越嚟越冇人氣，日本立教大學、東京外語大學和關西學院大學嘅老師同40幾個學生日前嚟到香港，佢都要黐住Plan B區諾軒去帶佢哋參觀立法會。
由佢貼出嚟嘅相可見，所有人都係圍住區諾軒聽講，連佢自己事後都話︰「然後發現冇一張相有我自己......失策失策。」
咁佢哋兩個帶班日本師生去立法會有咩講呢？原來係要「介紹香港立法會的運作和現時的社會爭議」喎。
周庭話，佢哋行到去掛住梁君彥張相嘅地方，「介紹」立法會主席工作時，「向日本的同學們分享了不少梁君彥在本屆立法會的『濫權行為』，希望他們也能藉着了解建制派『為求達到目的破壞規矩的手段』，明白到『香港民主運動的嚴峻』。」
隱惡拒提DQ 「峯搶phone」當無到
既然咁鍾意同外國人講香港立法會嘅「問題」，唔知佢哋又有冇講到啲真正嘅問題，例如周庭佢自己因為推動包括「港獨」為選項嘅「自決」而俾人DQ、區諾軒一入議會就衝撞保安人員、民主黨許智峯搶女EO（行政主任）手機呢啲嘢呢？ ■香港文匯報記者 甘瑜