■區鎮樺被踢爆佢疑似用雜物霸佔公眾地方。 網上圖片聲稱最鍾意教人乜嘢係禮貌嘅民主黨大埔區議員區鎮樺，近日俾網民踢爆佢疑似用雜物霸佔公眾地方，仲「警告」人哋唔好偷佢哋嘢喎。咁有「禮貌」嘅行為，當然就俾網民擺咗上網評吓理啦，唔少網民都鬧爆佢唔係第一次特權擾民，仲話以後都唔會再投佢𠻹。
惡人先告狀：已交警方跟進
我哋回顧吓區鎮樺一匹布咁長嘅惹火事跡先，繼早前違泊被抄牌，然後深深不忿喺網上公審警察話人冇禮貌，點知俾網民圍插返轉頭，質疑佢唔知衰仲濫用特權，鬧足3日3夜終於跪低「誠懇」向公眾致歉再俾人鬧多次冇悔意，區鎮樺近日原來仲俾網民踢爆佢其他劣行。
「Vincent Cheung」日前喺facebook群組「Tai Po 大埔」貼圖出文，話區鎮樺大埔嘅議辦6點半關門外出工作，但內裡就開晒燈同電視，質疑佢：「點解外出工作入面都要開電視？」
唔止浪費地球資源，區鎮樺仲好大官威咁霸佔公眾地方𠻹。「Vincent Cheung」話，區鎮樺疑似擺放宣傳品、盆栽等雜物喺岉鹵鴠~嘅公眾地方，「更霸氣貼出大量告示，『警告』不要偷取擺在疑似公眾地方的雜物，亦列明已把偷竊案交警方跟進。咁擔心人哋偷佢啲嘢，點解又唔放返入單位入邊呢？」
網民數臭惡鴿「擾民潛水史」
貼得出嚟當然就想大家評理，但「Vincent Cheung」都知區鎮樺「最重視禮貌」，所以提醒大家：「煩請各位都要很有禮貌！」「Wallace Wong」就概括話︰「特權違泊，特權繞過正常程序投訴警務人員，特權阻街，仲有無？」
疑似苦主「Tsz Chung」留言鬧爆︰「呢條所謂議員違法都唔係第一次啦！選舉期間，喺路邊搭起個棚架掛banner（橫額）條條fing（揈），好似作法咁，完全唔理道路使用者嘅安全，為咗要贏就唔理三七廿一！大聲公開到20樓都聽到，幾咁擾民！」
「Tiger Golden」亦批評︰「 我住係條友果（嗰）區， 選完之後就唔見咗人，上屆區議會出席率最差嘅議員， 我屋企人話佢懶，話唔投佢，但最後都含淚投白鴿（民主黨）， 嚟緊唔使指（旨）意我再同（投）佢。」不過呢個大埔區議員唔知係冇關心大埔居民嘅事，定係睇到個post都扮見唔到，一直都係冇回應過嘅。「Mui Mui Lam」揶揄︰「佢去左（咗）潛水，唔得閒處理。區議員好忙唔得閒，冇時間理呢啲。佢忙緊喺fb刪留言。」咁好在今次係喺「Tai Po 大埔」出文佢冇得刪啫。 ■香港文匯報記者 甘瑜