梁振輝 香港資深出版人
某下午，輝仔在街上遇上挺着肚子的前度婷婷。
輝仔：婷婷，婷婷！
婷婷（除下一邊耳機）：輝仔你呀，聽到入晒神，唔好意思！
輝仔：咁耐冇見，整番個下午茶咁呢？
婷婷：都好啫！
輝仔（甫坐下）：婷婷，聽還聽，行嗰陣至好唔好聽，唔顧個大都顧個細㗎！聽乜聽得咁入神啫？
婷婷：我聽嘅係「騷靈樂」。
輝仔：你啲「taste」（品味）有啲獨特噃！
婷婷：冇，上個禮拜去探老爺。傾開偈，佢話後生嗰陣鍾意聽「騷靈樂」......
輝仔：嘩，你老爺嗰時咁「in」（入時）㗎！
婷婷：點止呀，又上舞廳跳茶舞同睇「科騷」㖭！佢話，「騷靈樂」宣揚愛同寬容。我就係想個B第日係咁，所以咪做下「騷靈樂」胎教囉！
輝仔：我為為BB都信「音樂胎教」呢家嘢㗎！
婷婷：早幾個月你先至講緊同佢分咗手，乜得咁快又走番埋，仲「搞出人命」（有孕）㖭？
輝仔：講下啫！而家離婚結婚都唔係乜大嘢，咪冇通知囉！之後唔知聽邊個講，屋企如果有個細路，係可以維繫感情嘅，咁咪整番件囉！
婷婷：哦，原來係咁！以前係咁我哋就唔使......
輝仔：仲講呢啲！咦，講開我為為BB做音樂胎教嗰陣，係將部耳機放響個肚皮上面個噃！
婷婷：專家話，陀B媽咪自己聽就得㗎嘞；擺咁埋，啲聲波會「轟」（讀「轟1-4」）嚫個BB㗎！
輝仔：咁我叫為為唔好咁嘞！話時話，班藝人咪好興影大肚裸照嘅，有冇諗住整番輯咁呀？
婷婷：有呀，遲啲我仲會參加個「最美大肚婆『花生騷』」，贏咗有成廿萬BB教育基金㗎！
輝仔：咁就預祝你成功嘑！
婷婷：承你貴言！
輝仔：近排我同為為追緊嗰輯「BB搵老豆」，場面既溫馨又感人，個個主角拍完都名成利就；講真，你有冇諗過第日畀個細路上呢啲節目呀？
婷婷：話就「真人秀」，咪又係「做秀」！好似有集講有個老豆見嚫個仔有乜行差踏錯就鬧到佢飛起；突然間，個仔爆咗句：「你可唔可以唔咁燥底呀？」之後個老豆仲好愧疚咁同佢講「sorry」，乜你覺得呢啲幾震撼、幾感人嘅對白會係出自一個四、五歲細路把口咩？設計對白咋啩！上過呢啲節目，啲細路仲會有心機讀書咩？
輝仔：又唔係咁講，表現得好，第日咪做星媽囉！
婷婷：留番畀你個為為BB喇吓！
上期提到，「騷」是「show」的音譯。作為動詞，「騷」表示「展示」；作為名詞，「騷」可表示「表演/節目」和「靈魂（soul）」，如：夜總會中的表演節目叫「科騷（Floor Show）」；時裝表演（Fashion Show」叫「花生騷」；源自美國黑人的「Soul Music」叫「騷靈樂」，當中的「科」譯自「floor」，「花生」譯自「fashion」，「騷靈」的譯法則來自「soul」的音和義。
隨着改革開放，各式各樣的「騷」在內地如雨後春筍。對「騷」的音譯，內地會用「秀」。「秀」有優秀的意思。實話實說，如非優秀，又怎能當「表演」者，又憑甚麼向人「展示」實力和魅力呢？因此以「秀」代「騷」，不止音近還意近，效果更勝一籌。
現今，人們用「做秀/作秀（做show）」來形容在公開場合故意表現與眾不同的行徑，意圖引人注目或出風頭的人，當中不乏弄虛作假的騙人手法。後來，「做秀」的概念擴展至政界，甚至國防的層面。比方說，有區議員和立法會候選人平時就「豹隱」，選舉期間，無論大小場合，也找到他們的蹤影，予人「做秀」的感覺。又比方說，對於近年各國規模宏大且頻繁的軍演，有人認為對內可提振軍方的士氣，對外則可收阻嚇敵人的作用，且能讓外界了解軍方的能量；有人則認為勞民傷財，「作秀」大於一切。
近年國內外熱播的「真人秀（Reality Show）」，最大的特色是把普通人（非演員）的追夢之路搬上電視屏幕。筆者最欣賞的是有部分「真人秀」真正做到「零門檻」--讓具才華的普通人有展示的機會。然而為了爭取更高的收視率，好一部分含水分過多--評判七情上面、觀眾狂呼淚崩，如斯煽情的投入，令人驚嘆不已。及後，有媒體「踢爆」（揭發）有「真人秀」的觀眾是臨記，且部分情節是預設的，那這些「真人秀」只可說是「真人作秀」了。
近期內地有電視台推出另類「真人秀」--「親子戶外真人秀」，聲稱實錄了特約明星及其年幼子女一起在條件較惡劣的環境下生活數天的互動經歷（後來引進了平民小孩）。無可否認，這類「真人秀」有一定觀賞價值，可大家在觀賞之餘又有否想過這些節目會帶來什麼的影響呢？對一個四、五歲的「明星娃」，其一舉手一投足均受傳媒吹捧、觀眾激愛，試問萬千寵愛在一身的他/她還須在其他方面思進取嗎？再說年紀小小的他/她，已體會到自己和爸爸的「無縫合作」可帶來超乎想像的回報，往後的人生價值觀又怎去釐定呢？看到節目為主角所帶來的名和利，廣大的家長和小孩們能不趨之若鶩嗎？無巧不成書，執筆時「中國政府法制資訊網」刊登了《規定》，列明未成年人節目不得宣揚童星效應或者包裝、炒作明星子女。筆者認為有關當局應不欲看到青少年「使大咗」（過度消費/over consumption）--受潮流文化及虛榮心等因素衝擊，而盲目地去追求不切實際的人生目標，以至影響身心健康成長。
【專欄簡體版】https://leoleung2016.wordpress.com/