■記者會上有氣球爆波，認真唔老嚟。香港文匯報記者鄭治祖 攝自從「自決派」姚松炎喺上次立法會九龍西補選落敗，暴露反對派從競選宣傳到事後認衰都「關公災難」連連，唔少人都關注劉小麗今次會唔會有咩唔同。不過，佢啲懶係文青嘅文宣早前已經俾好多人鬧爆離地，噚日佢個宣佈參選嘅記者會更係狀況屢出，整個氫氣球儀式都爆波蝕咗度氣，都真係幾唔老嚟。
劉小麗拎住個氣球拍宣傳照懶係文青，已經俾人話佢九唔搭八，但佢哋對氣球似乎有一種執着，噚日活動上就有個氫氣球儀式，叫嘉賓將佢哋啲願景寫落去個氣球到，諗住有啲視覺效果，但點知未寫完個氣球就爆咗，場面一度尷尬。「Plan B」李卓人就自說自話咁講︰「爆得好呀！爆晒啲衰氣走！」不過大家睇落就似蝕咗度氣多啲囉。
市民嗌「打倒劉小麗」贈慶
有市民路過見到佢個活動都係有話直說。劉小麗班人企喺台上自吹自擂，但有街坊似乎唔多歡迎劉小麗，路過時仲大嗌「打倒劉小麗」贈慶。亦有店主不滿佢哋個活動影響人流，甚至連劉小麗個名都嗌唔出，反問︰「邊個嚟㗎？係咪俾人DQ嗰個呀？」咁就睇到劉小麗幾咁「深入民心」。
劉小麗口口聲聲話要「守護平凡人的幸福」，但噚日個活動就安排咗成班記者暴曬咗個零鐘，都未察覺到大家大汗疊細汗，似乎「體察民情」都係得個講字。■香港文匯報記者 鄭治祖