■馬桂愷指App內集合了Instagram、Facebook、WhatsApp的元素。 香港文匯報記者潘達文 攝創立一個新App，過程殊不簡單。記者當日到訪馬桂愷的寫字樓，牆上滿滿的手繪圖，顯示團隊在創作過程中「brainstorm」的艱辛過程。他亦坦言創業壓力大，尤其一開始的患得患失：「有時你覺得係咁，但又擔心出嚟個效果，所以創業就真係要有啲夾硬嚟，試咗先，然後慢慢再改，都係憑一股衝勁先去做。」
馬桂愷本身是會計師，後來到一間大型發展商從事租務發展及物業管理的工作，之後離開自行創業，2011年創辦網上租樓平台網站「好好租」，最近再創辦「Real」，有一定創業經驗。現時公司已將資源重點放在新業務上。
假盤充斥全球各地
他回憶：「有次我去外國聽一個property portals會議，個個外國經營者都話做咗幾個月，已經有50萬個盤，或100萬個盤，但我諗深一層，點解咁多盤？其實好多都係水分盤、假盤。其實全世界都有假盤存在，因為佢嘅作用係增加曝光率，而經紀係唔會update個價，一個經紀做咗8隻盤，其他嘅都係繼續擺喺度釣魚、當廣告。」
「個陣我就諗到一個idea，點解要俾經紀放咁多隻盤，點解唔齋放一隻呢，我坐喺度諗咗好耐。如果一個經紀，喺平台上放佢覺得最好嘅盤，咁其實可以解決好多問題，盤源又真，個經紀又做到生意。」於是，去年中其團隊用了5個月時間創作「Real」的第一版本，再用一年時間優化成第二版，兩個月前正式於美國推出。
慨嘆港初企請人難
香港創業土壤並不肥沃，他表示請人尤其困難：「好多人都想去大公司，都會想返穩定嘅公司，行業嘅人才亦都唔多。」目前公司團隊人數連他在內只得10人。「不過大家都好幫手，無階級觀念。」看得出創意公司的年輕活力。
創業路從來不容易，馬桂愷說，其團隊需要經常開會傾創意，他自己上班更加要朝八晚九，笑說：「仲有得瞓，但瞓覺都會諗住囉。好多時我九點返到屋企，屋企人已經吃完飯。家庭係好難兼顧㗎，但有時要取捨，屋企人埋怨實有，因為相處時間少咗，有時相處緊個腦又會喺度諗其他嘢，所以要盡量控制，周末就留俾屋企人。」