見到成堆反對派大佬近日瘋狂「搞基」又「屈基」，被揶揄為「五短人」嘅社民連副主席黃浩銘當然都想出嚟抽水刷吓存在感啦。話說曾創立「香港民主進步黨」嘅楊繼昌日前喺facebook開post鬧老馮（馮檢基），話佢2010年去西環傾政改就係「投共」，而「五短人」都諗住借題發揮，喺留言度貼咗當時嘅相仲要圈住老馮，話佢背離反對派，唔知係人定係鬼。點知就俾網友大爆黑材料，話原來成班撐小麗老千（劉小麗）嘅反對派中人當時都在場，甚至連「Plan B」你呃人（李卓人）都有去「做鬼」。諗住「搞基」，點知回力鏢一下華麗抽擊晒成班反對派，真係不禁令人質疑，「五短人」喺反對派中係人定係鬼？ ■香港文匯報記者 何西
楊繼昌日前喺fb開post，話「有人話馮檢基『投共』沒有證據，民主黨2010年『投共』入中聯辦就是證據；即係呢，馮檢基代表民協，當年係緊接民主黨入中聯辦，然後投票支持政改方案。」而五短人亦執到寶咁留言，post咗當時一眾政界人物喺中聯辦合照，仲要大大個紅圈圈住老馮，暗寸老馮係反對派內鬼。
五短人潑紅 被拆穿雙標
其實「屈基」屈得咁明顯，係人都睇得出你哋班反對派咪又係想再度逼退老馮，咁你哋撐嘅小麗老千咪少個對手囉。點知五短人轉個頭就俾人「以子之矛，攻子之盾」，有網民話當時有去中聯辦嘅反對派根本唔止老馮一個。fb專頁「狙擊政棍小隊」就直抽五短人雙重標準，明明佢張相除咗老馮之外，最左邊嗰3個人分別都係民協同民主黨嘅成員，仲要全部都支持小麗老千，「有本事就叫劉小麗唔好接受民主黨同民協嘅支持，叫佢出嚟割席吖，唔夠膽呀？」
小麗個後台 鬼全部係鬼
除咗小麗老千嘅支持者有去「做鬼」，又有網友搵到相，原來連佢個「Plan B」你呃人嗰時都有去中聯辦。如果按照五短人個邏輯，只要當時有去中聯辦傾政改就係鬼嘅，唔知佢又會唔會極力反對你呃人做Plan B呢？
「狙擊政棍小隊」爆完大鑊都唔夠喉，又再恥笑五短人自製強力回力鏢：「諗住向馮檢基打個乞嗤，結果令『己方陣營』一大堆人感冒，你黃浩銘真係成世都咁××，同吳文遠兩兜友出嚟幾耐就×足幾耐。呢啲咁嘅人，只問派系立場，不問是非黑白，仲話『爭取公義』喎，挑！」
其實樣衰咗嘅話慢慢件事都會丟淡啦，點知五短人又嬲嬲豬衝出嚟反駁，撒野式咁話自己冇「屈基」係內鬼、民主黨去中聯辦唔代表係「投共」、幫老馮講嘢就係撐老馮，真係搬到個龍門都自覺忙碌。「狙擊政棍小隊」亦都冇理佢呢堆假動作，直接切入叫五短人唔好再雙重標準「屈基」，要鬧就公道少少咁鬧埋小麗老千同你呃人囉，「我只係要相同標準，如果你鬧馮檢基入中聯辦，就要對民主黨民協同一標準。叫劉小麗割席吖！」
亂掟回力鏢 大佬全中招
「Kinson Yuen」亦覺得五短人淨係針對老馮又唔提其他反對派好無恥：「既然都話民主黨成堆都貢過入中聯辦啦，咁做咩唔圈埋d（啲）民主黨人出黎（嚟）呀？淨係圈馮檢基係咩意思先？因為民主黨無×恥係人都知唔使圈，定係另有所指呀？」
「Sunny Kan」就話：「×街『村短』（黃浩銘）喺度偷換概念，邊×個話支持馮檢基？而（𠵱）家係睇唔×過眼你班陷（冚）×鏟係（喺）度玩欽點Plan B！」「Jason Cheung」就揶揄五短人：「李卓人都『投共』喎，點解某黨又支持佢做『plan b』？」
其實五短人都唔係第一次整個回力鏢畀隊友嘆，講少句咪唔使俾人笑囉！