■真係冇比較就冇傷害，得小貓兩三隻肯提名小麗老千，見到都覺得「心酸」。fb截圖小麗老千（劉小麗）最近積極為即將舉行嘅立法會九龍西補選收集市民提名，而日前亦有喺fb上貼文，口口聲聲咁話「街坊反應非常踴躍」、「排住隊要提名小麗」，造勢咁款造到好似好多人支持佢咁。點知就俾網民大踢爆，話根本小麗老千個檔口得小貓兩三隻幫佢簽名提名，銷情慘淡到咁都話反應踴躍，真係不愧為小麗老千。
香港文匯報忠實讀者「JoJo Wu」日前喺fb貼上小麗老千個提名檔口同「本土民主前線」前發言人梁天琦兩年前喺沙田火車站收集提名嘅對比照，圖中見到肯幫小麗老千簽名嘅人真係十隻手指都數得晒，而梁天琦大大話話至少都叫做有條人龍啦。真係冇比較就冇傷害呀，連落選嘅梁天琦都仲多提名過小麗老千，又何來佢口中講嘅「街坊反應非常踴躍」呢，定係佢左眼見到鬼？
小麗老千又話「市民有幾想『民主派』今次補選贏回一仗呢？睇佢哋圍埋嚟，排住隊要提名小麗就知！」用返反對派嘅「術語」，希望佢哋得到「合乎比例」嘅勝率啦。■香港文匯報記者 何西