■長毛喺節目度向狗主咆哮，俾網民窒佢「毛賊神經病」。 「狙擊政棍小隊」fb截圖民協早前話喺今次立法會九龍西補選會支持李卓人，但就留一手咁叫大家停止攻擊佢哋個退黨「元老」馮檢基，早幾日佢哋個麗閣社區主任李炯更加喺大街大巷幫馮檢基拉票，搞到萬聖節都未到，班李卓人同小麗老千（劉小麗）嘅盲粉就要出動捉鬼。好似一早做咗「屈基」橋頭堡嘅網台「香港花生」，就接連有節目炮轟民協，社民連個廢陶（陶君行）批死民協啲區佬會排住隊倒戈撐馮檢基，以「時評人」自居嘅劉細良更話基本上可以唔使當民協係「泛民」。大家話啦，民協班友為咗選舉搞到馮檢基要走，結果仲俾人咁話法，會唔會覺得仲仆落街幫李卓人助選有啲犯賤呢？
話表面撐「人」唔係「泛民」
廢陶同劉細良喺前晚「香港花生」一個節目度，片到民協體無完膚。劉細良形容民協同馮檢基和平分手係「離婚擺酒」，一定有古怪，雖然民協主席施德來上台發言支持李卓人，但根本上係彈弓手，無黨紀無紀律，可以縱容李炯幫馮檢基拉票，正一「契弟」咁話。
廢陶就話民協啲區議員會排隊倒戈，否則都係「半心半意」，「貼吓李卓人啲海報，跟住可能私下上門，甚至喺啲活動入面就叫投阿基，我估中嘅，我一定批死！」
劉細良仲一口咬定，施德來啲民協頭面人物支持李卓人，只係為咗出年區選繼續要舐「泛民」啲票，而佢縱容民協中人倒戈，基本上唔可以當民協係「泛民」政黨。
廢陶加把口，話以佢對民協嘅認識，呢班係壞人，入去民協都係為議席，同時有「民主派」呢個貞節牌坊，而如果民協唔撐李卓人，出年區選「泛民」唔使參佢玩。
劉細良亦都覺得可以唔使理民協呢支旗，因為佢哋會逐個逐個支持馮檢基，幫對方做個勢出嚟，令人覺得對方都有機勝選，咁就可以整死李卓人。
李卓人喺早幾日首場電子傳媒選舉論壇俾人圍攻。廢陶話聽到啲意見覺得李卓人唔係幾掂，甚至要求操吓�嘅口才，但廢陶覺得李卓人幾廿歲操都操唔嚟，應該「穩守突擊」，最後一兩場先發揮，「咪畀阿基威吓先囉。」
長毛（梁國雄）就喺另一個「香港花生」節目話，如果民協覺得馮檢基出嚟選係錯嘅，就應該落手落腳喺馮檢基啲票倉拉票，仲話支持馮檢基啲阿公阿婆唔識字，派傳單都無用，應該落多啲嘴頭。
長毛忽然笑狗主無膽參選
不過，明明講緊民協，長毛一下子就燒到呼籲喺九西補選唔投票嘅「狗主」黃毓民嗰疊，可能佢覺得反正唔支持李卓人嘅都要批鬥：「輸咗就喺屎坑度啦，唔好捐出嚟啦，屎蟲！輸咗呀你，毓民！出嚟選吖，咁多嘢講！出嚟選吖嘛，攞返自己啲票吖嘛，阿哥！驚呀？」
facebook專頁「狙擊政棍小隊」今次就盯上咗長毛，話如果狗主選，長毛就鬧佢鎅票，唔選就叫人夠薑就出嚟選，「過咗提名期啦！」 ■香港文匯報記者 陳庭佳