■余智榮成功爭取區內設施嘅橫額，俾鄭松泰嘅橫額遮住。 fb圖片反對派啲立法會議員真係好大官威㗎！除咗民主黨個許智峯會喺地區辦事處違例加人哋個名之外，「熱血公民」個蟲泰（鄭松泰）亦都好似大晒咁攞自己幅橫額遮住人哋嗰幅，自己幅嘢黐唔實跌落地，就發惡即刻報警話俾人「破壞」喎。俾佢遮住又俾佢哋影射破壞嘅大埔區議員余智榮就話，立法會議員真係唔同啲，報一報警就有近十個警員到場招呼，好彩都有十幾個街坊肯做證人，提供資料配合警方查案，證明冇人搞過佢張橫額。
空降圖搶余智榮功績
余智榮近日喺坉耖acebook專頁「余智榮流動資訊站」度貼相出文，踢爆蟲泰嘅惡行。佢話蟲泰恃住自己係立法會議員「地位高」，啲隨從又「聲大又夠惡」，批評蟲泰倒插國旗侮辱國家都敢做，「區區黎民百姓一定不會放在眼內」。
佢繼續話，唔知蟲泰係咪想喺新界東「開疆闢土」，想為「熱狗」喺新界東攞多一個立法會議席 ，所以首站去到運頭塘區搞搞嘢，試試水溫。原來，原本余智榮貼咗張成功爭取區內設施嘅橫額出嚟，但有街坊就目擊有人用蟲泰張橫額遮喺上面，余智榮質疑︰「唔通明知人哋已爭取到，自己只是抽水，所以心虛遮住人哋橫額唔比（畀）人哋比較，真唔知呢啲叫叻定叫蠢。」
橫額跌落即報警發惡
不過，遮住人哋幅橫額又遮得唔夠認真，之後蟲泰幅嘢就自己跌咗落地，有街坊亦即刻通知余智榮呢件事。余智榮話自己做完嘢就去現場睇吓，點知已經見到有兩架衝鋒車近十個警員到場，「真大陣仗，查詢警員原來是鄭蟲（松泰）議員有人報警話『橫額被破壞』，利（厲）害立法會議員真係唔同啲，報一報警就可浪費咗納稅人咁多資源（唔怪得運頭塘巴士總站違泊成日都話唔夠人手即時處理啦），後（嚟）警方調查一輪無事了結。」
余智榮狠批蟲泰班人自己惡人先告狀，以為個個俾佢蝦都唔會出聲，佢多謝有街坊自發抗拒毒蟲，又感謝十幾個正義街坊，影相、畀口供、做證人去配合警方查案。
唔少網民都鬧爆蟲泰班人嘅行為無恥。「Ruby Wong」批評︰「佢有冇搞錯呀咁（遮）住人哋banner都得。」fb專頁「泛民可恥行為事件簿」亦批評︰「惡人先告狀，仲要浪費警力。」「Albert Au」就恥笑班「熱狗」竟然向警察求助︰「話警察係『黑警』，最後又叫警察，『熱血公民』係人間垃圾既（嘅）組織。」 ■香港文匯報記者 甘瑜