■謝霆鋒不停同食客合照。香港文匯報訊 最近，謝霆鋒同快餐店合作，以港式地道風味為主題，設計了兩款漢堡包及一系列美食。日前，要求甚高的霆鋒為了睇客人反應同食品質素，就同經理人霍汶希（Mani）突襲快餐店。在櫃位買餐時，霆鋒order了兩份自己的包餐，畀錢時，本身諗住請客的霆鋒原來帶不夠錢，企在側邊的Mani笑到收不到聲，最後由Mani負責埋單。畀完錢，熟晒架步的霆鋒同Mani就企過隔籬等餐，對於霆鋒突襲餐廳，不少食客都勁surprise，其間更吸引不少食客圍住影相同走埋去自拍，霆鋒都來者不拒。
為了「親親食客」，拎餐後霆鋒決定搭枱同其他食客齊齊開餐兼吹水。其中一對食客剛好食緊「鋒味安格斯煎蛋肉醬包」，於是佢即刻埋去做調查，霆鋒問：「有冇食過窩蛋免治牛肉飯？似唔似件事但係變成一個摩登的做法？」男食客話絕對係，仲話個包好飽肚。試食時，霆鋒就食得好滋味，仲解構醬汁同塊特厚安格斯牛肉，睇來好滿意咁喎。