![■蟲泰話自己發言「太高水平」先會被趕離場喎。 fb截圖](http://image.wenweipo.com/2018/11/02/a11b.jpg)
噚日立法會否決傳召官員解釋點解唔畀馬凱工作簽證續期,但「熱血公民」主席蟲泰(鄭松泰)發言就發到離題兼離場,搶咗唔少風頭,但就係負面嗰隻囉!事緣佢讀緊篇只係提咗兩次馬凱嘅發言稿,俾立法會主席梁君彥多次警告離題仲照讀無誤,被趕離場之後更加賴對方「理解水平低」,聽唔明佢啲咁「高水平」嘅發言喎。有網民一於拜讀佢篇發言稿,但就發現佢「成功爭取」美國副總統彭斯「坐正」,連人哋職銜都搞錯。有口痕友就覺得佢全程自話自說,通緊靈都未定!
談拒簽變咗講世史
蟲泰喺facebook話,篇發言稿係《熱血時報》主持、佢助理靳民知幫佢準備嘅,圍繞佢「以『香港為本』在中美貿易戰及中美代理人戰爭的狀況下之立場與思想」,正常人包括梁君彥當然都覺得佢講到九唔搭八,但佢就十分阿Q精神咁覺得︰「結果,因太高水平,被逐出會議廳。」
靳民知?M家冇人識你呀!高?邊度高呀?睇過?蟲泰就分享咗靳民知呢篇「鴻文」,入面提出大量新中國成立之後同中美關係嘅大事,睇落「好高層次」,但facebook專頁「狙擊政棍小隊」就唔係咁諗嘞。
專頁嘅帖文揶揄:「鄭松泰議員一開波發言就『香港正面臨自太平洋戰爭以來的最大危局……』,又咩尼克遜承諾結束越戰,所以贏得1968年美國總統選舉。梁君彥都警告咗佢三次,話佢講5分半鐘『歷史背景』都未入正題,咁多年嘅『議員被趕離場』之中,呢單都算得上係最×。」
專頁仲周到篇稿將美國副總統彭斯寫成「美國總統」𠻹。「鄭松泰議員都有個優點,就係面皮夠厚,佢喺fb話自己『水平太高』……唔該啦,咩『美國總統彭斯』咁低能嘅錯誤都可以犯,作為一個議員,認真睇吓啲稿,執執佢先掟出街啦,唔係人哋寫完畀你,就咁拎去議事廳讀就算㗎,尤其係幫你寫稿嗰條友係一個知名廢柴。」
網民:留返拜山先講
「Martin Luk」仲抵死,話蟲泰自話自說,靈界先聽得明,「你留返拜山先講啦!」「順利黃」笑到收唔到聲:「自己話自己演講水平太高,大佬呀,啱啱食緊飯,幾乎噴到成枱都係!正×街!第日講笑話,唔該提早揚聲吖!」
雖然蟲泰今次個解釋真係前無古人,不過「鄭志傑」就覺得咁樣博被趕離場始終都係為咗「走堂」,「走堂舊橋!進步啲,用吓新招,無啲新意要扣人工至得㗎!」 ■香港文匯報記者 陳庭佳