■袁健恩踢爆李卓人有份缺席，令到唔畀「鉛水」事件涉事承建商再接項目嘅議案被否決。 fb圖片反對派到𠵱家立法會九龍西補選都仲嗌緊「關鍵一席」，但佢哋喺啲重要嘅議案同撥款表決不時「關鍵缺席」，就幾乎連盲嘅都睇得出。「議會陣線」立法會議員區諾軒日前就許咗個「卑微願望」，話好想議會有返個人「頂住」、唔畀再改議事規則喎，講到底都係想sell李卓人係「關鍵一席」啫！一度被視為係「青症」（「青年新政」）Cheap禎（游蕙禎）個「Plan B」嘅袁健恩，就踢爆反對派連唔畀「鉛水」事件涉事承建商再接項目都頂唔住，仲點可以旨意佢哋「守住議會」喎。
區諾軒日前喺facebook報料，話自己幫九龍西補選候選人、工黨李卓人貼咗成晚海報。唔知係咪攰得滯，佢話想搵個人頂住喎：「今次選舉，直接決定建制派改議事規則得逞與否。不管是誰，我只希望有返個人頂住。好卑微好卑微的願望。」
區諾軒又講「關鍵一席」
袁健恩就覺得區諾軒雖然講得非常之正確，但係反對派做唔做到呢樣嘢就係問題嘞。佢攞返3年前嘅舊聞嚟喚醒選民嘅記憶：2015年7月一次立法會財委會會議上，「人民力量」陳志全動議唔畀涉及公屋「鉛水」事件嘅承建商接東九文化中心嘅項目，最後被9比21大比數否決咗。
當時，在席9個反對派議員全部贊成，但同時有成10幾個失蹤咗，包括當時仲係議員嘅李卓人，同埋九龍西補選另一個候選人馮檢基。
袁健恩仲喺標籤度向反對派發炮：「我唔係話有險可守，但佢哋班友係守都唔守，你哋喺入面冇投票就得，市民唔投票就叫焦土。」
佢又話自己唔係想狙擊邊個，只係想講反對派唔好怪人唔投票，呢個局唔係「焦土派」造成嘅，而係反對派自己攞嚟嘅。
自己都遊日「關鍵缺席」
其實袁健恩都算厚道㗎啦，唔攞返直接關區諾軒事嘅「關鍵缺席」事件嚟直線抽擊。好似喺今年5月，立法會工務小組委員會以16比13通過用17億元喺元朗起行人天橋，反對派一直起晒弶要反對，但最後區諾軒、黃碧雲、胡志偉、許智峯同郭家麒呢5條友缺席，令到議案通過咗。
其中區諾軒俾人周到同老婆去日本旅行，事後仲死唔認低威向網民開火𠻹。
九龍西補選其他候選人仲有陳凱欣、伍廸希同曾麗文。 ■香港文匯報記者 陳庭佳