■張衛健自言好有童心，未夠成熟照顧下一代。否認張茜再懷孕 對生B有陰影
張衛健（Dicky）主演的《大帥哥》雖然角逐TVB視帝失敗，卻贏得民心，收視節節上升。這是Dicky相隔22年再次拍攝的無綫劇集，為的只是了卻自己心願。2007年，太太張茜懷孕，卻在臨生BB時小產。走出小產陰霾，Dicky直言唔再想生小朋友一事，雖然年過50歲，但自己都是一個大孩子，未夠成熟照顧下一代。現在他和張茜有自己的事業，來緊人生要開啟下一頁。
張衛健跟太太張茜當年因拍劇結緣，至2007年，Dicky跟張茜在北京正式註冊結婚。翌年，張茜懷孕8月時，孩子在胎中突停止心跳，需經搶救最終保不住胎兒，Dicky夫婦飽受喪孩之痛，為讓太太釋懷，Dicky2009年在菲律賓補辦盛大婚宴，更稱要讓太太成最幸福的新娘。
記起當年農曆新年，小明哥（徐小明）生日宴請傳媒食飯，當時Dicky也是座上客，還開心分享快為人父的快樂，可惜之後傳出不幸消息。之後多次傳出張茜再懷孕消息，但Dicky今次做訪問坦言沒這些事。
「原來咁快已經10年時間，咁多年來，都沒再想生BB一事。自己都50歲啦，仲好有童心，未夠成熟照顧下一代。如果上天畀我哋去選擇，一係我哋一擊即中有小朋友，或永遠不會再有小朋友，我寧願選後者，因為我哋曾經歷傷痛的回憶，不敢再去面對多一次，所以坊間的傳言都唔啱，冇！冇再有BB！現在幾好，阿茜有自己的事業，家中又有狗陪伴我哋，來緊人生要開啟下一頁，未包括生兒育女。是否有子女，就順其自然。」
「還劇」予香港觀眾
早前《大帥哥》未播先引起網民熱話，只因傳抽起不播，令網民發起「還我《大帥哥》」行動。雖然此劇最後未能為Dicky贏下視帝，但卻是圓了他多年心願，不為別人，只為自己「還劇」給香港的觀眾。
「其實當年拍完《西遊記》，大家以為我拍續集時，我就去了台灣發展，然後又去了內地工作，一走20年，個心總是有些事，好像放不下。到底咩事呢？原來我成日覺得當年跟香港觀眾不辭而別，『我欠香港觀眾一個劇』。簽得畀人，就要幫人搵錢，嗰22年有20年的時間唔係我的。TVB人工有幾多，大家明啦，等我拍半年TVB劇，唔好玩啦。直至近5、6年，我沒有簽公司，一年365日，自己接自己工作，終於可以自己決定工作內容。有次同珍姐（曾勵珍）傾開，找我才成事。一開機已不捨得拍完，因不知道下次再拍全廣東話劇是何時？無厘頭的廣東話金句，度稿的時候自己都好爽。當中的對手全是新拍檔，外間成日寫蔡思貝點點點，如果我出聲讚，你們又話我幫住佢。但事實上，佢真係好勤力，唔係我講的，幕後話我知的。至於有冇獎，做咗咁多年戲，其實在演藝方面呢，我印象中係冇咩點攞過獎，我習慣咗，冇獎攞我習慣咗，但我覺得真係最緊要，喺觀眾心目中如果我係半個影帝半個視帝咁，我已經好開心。」
訴說離鄉拍劇辛酸
Dicky除了演戲叻，還跟許志安、蘇永康及梁漢文組成Big Four。Dicky唱歌出身，1984年參加TVB及華星唱片合辦的第3屆新秀歌唱大賽得到金獎和最突出台風獎入行。出碟不成，倒是加入戲劇組捱足6年後被力捧，Dicky演的孫悟空、韋小寶，是一代人的集體回憶。
「講唱歌 ，許志安、蘇永康及梁漢文都唱得比我好，有年TVB叫我返香港攞季選，我話有更多歌手比我值得個獎。參加比賽前，我17歲已經在酒廊擔任駐唱歌手養家。後來入行拍劇，捱咗5、6年，就算做緊大配角，得幾句對白，簡單十幾個字，我會諗廿幾種版本出來。
初初北上拍劇，吃了不少苦頭，離鄉別井是其一，另外語言不通也是問題。剛上去，唔識普通話，全個劇組沒有人講廣東話，有時連別人叫我埋位都聽不懂，以前擅長的創作，像被廢掉一樣，當時很是徬徨，惟有死撐下去，並努力學好普通話。現在大家每次搵我拍攝，我會幫手度埋對白，要讓人覺得，請我係咪好值先。」
採訪：植毅儀
攝影：彭子文
地點：九龍東皇冠假日酒店42樓