■去年高等法院裁定梁國雄、姚松炎、羅冠聰、劉小麗宣誓無效，取消議員資格。 資料圖片明析「補選死因」暗「拔毛」 余若薇再踩一腳
反對派喺今年兩次立法會九龍西補選都敗北而回、仲越輸越多，𠵱家仲輸到自己方寸大亂。啱啱今次先強調「DQ者優先」嘅「政治倫理」，反對派大台又再搬龍門，開始質疑被DQ咗新東議員資格嘅「長毛」梁國雄，批評佢係咁同「獨派」、「本土派」支持者互罵，其中公民黨創黨黨魁余若薇仲話，如果之後有新東補選，由長毛去選嘅話，反對派隨時連香三鑊??。反對派喉舌《蘋果日報》近日就整咗個「補選死因庭」系列，睇落好似計晒數、做晒訪問好認真咁款，不過佢哋無啦啦辣到去新東補選同長毛嗰瓣，就連普通網民都睇得出唔係咁簡單，直言反對派已經唔再唱好長毛，但有人就繼續堅持大台一路宣傳嘅「政治倫理」，認為點都應該支持長毛，睇嚟反對派又隨時大亂鬥多鑊。 ■香港文匯報記者 連嘉妮
《蘋果》近日整咗個「補選死因庭」系列，話就話分析點解工黨李呃人（李卓人）敗選，但講講吓就變咗長毛未來可能嘅選情分析。前日《蘋果》先砌數據，聲稱Cheap禎（游蕙禎）同「狗主」黃毓民前年攞到成5萬票，同李呃人今次九西補選流失嘅票數吻合，但係Cheap禎攞嘅係20,643票，狗主就係20,219票，加埋都係4萬票多啲啲，《蘋果》做乜咁抬舉佢兩個呀？
不過咁又係，唔話吓流失呢啲「獨票」、「本土票」，噚日嗰集就更難言之成理。噚日《蘋果》就辣到去新東補選同長毛嗰瓣，話長毛大大力「×票」令反對派擔心佢會輸埋新東補選，仲搵咗「獨派」的士梁（梁頌恆）同「中箭」（「香港眾志」）主席林朗彥做訪問。
的士梁hea撐長毛
的士梁話「倫理上」應該支持長毛「重奪」議席，但長毛如果要爭取跨光譜選民支持，就應該「謹言慎行」喎。不過，喺成個訪問入面，的士梁都無講到佢自己或者其他「港獨」分子會唔會去選，同埋會唔會勸「獨派」、「本土派」支持者撐長毛嘞。林朗彥就話長毛「抗爭經歷同視野無人質疑」，但佢應該要留心選民喺社運重創之後嘅情感同對政治嘅睇法，咁婉轉咁表達自己嘅保留，係好嘢嘅。
網民：入返都冇乜作為
有網民就覺得《蘋果》同反對派夾計踢走長毛。「Hc Wong」話：「佢又×票又講過唔要『本土』啲票，佢今次都窄窄哋。『泛民』啲人已經唔唱好佢。」
不過「Jackie Cheung」就仲堅持緊反對派喺11月25日九西補選嘅講法︰「長毛入返議會都冇乜作為，但個議席本來係屬於佢。如果佢冇被DQ絕對應該投返畀長毛。」「Neil Chan」亦鬧爆疑似踩親長毛嘅的士梁︰「顧掂你自己先la（啦）！」
「Anson Woo」就看透大家爭奪嘅本質︰「十皮嘢個月啊，哥仔。幾×關鍵先得㗎！識唔識嘢呀？」係囉，長毛肯定就唔會輕易罷休，但大台又開始轉風向，究竟長毛係咪繼老馮（馮檢基）後下一個被批鬥嘅對象呢？