■「健吾」喺fb踢爆反對派扮失憶。 「健吾」fb截圖喺《粵港澳大灣區發展規劃綱要》公佈後，反對派不斷聲稱香港「被規劃」、「上賊船」。不過，喺2011年，包括民主黨、公民黨同工黨明明都支持過「推動粵港區域經濟融合」議員動議嗰噃，咁快就失憶？話佢哋唔係為反而反，就真係講都冇人信囉。
喺2011年5月5日，立法會討論由時任議員梁君彥動議嘅「推動粵港區域經濟融合」議案，包括要打造更具綜合競爭力的世界級城市群；建設以香港金融體系為龍頭的金融合作區域；打造世界先進製造業和現代服務業基地；構建現代流通經濟圈；廣東對港澳服務業開放先行先試，並逐步將有關措施拓展到內地其他地區；加快共建粵港澳優質生活圈步伐。
鴿訟工黨同投贊成票
最後，議案喺35名議員贊成，兩個議員反對下獲得通過。當時投贊成票嘅，除咗建制派議員外，民主黨嘅何俊仁、李華明、涂謹申、張文光、劉慧卿、李永達、甘乃威、黃成智，公民黨嘅余若薇、梁家傑、陳淑莊，民協嘅馮檢基，工黨嘅張國柱等都投咗贊成票。
至於工黨嘅李卓人、何秀蘭，街工梁耀忠，社民連「長毛」梁國雄等其他冇投贊成票嘅反對派議員，並唔係投咗反對票，而係缺席，連會都費事開。
不過，喺大灣區發展規劃綱要公佈後，曾經投票支持粵港經濟融合嘅民主黨，其主席胡志偉就話特區政府「自我矮化，自甘墮後，沒有以香港利益出發，任由香港『被規劃』，甘願成為內地其他城市的『妹仔』」。
公民黨黨魁楊岳橋亦「憂慮」，香港「被規劃」，令人擔心香港的獨特地位可能會「被削弱」；國際社會可能會將香港等同其他內地城市，衝擊香港的獨立關稅區地位；融合會帶來更多城市間的資源及人才爭奪等等。
反對派為投黃絲所好隨風倒，經常一時一樣，一直撐「獨」嘅商台節目主持人「健吾」（葉鍵濠）就喺fb貼返出2011年「推動粵港區域經濟融合」議案嘅投票紀錄，仲話行政長官林鄭月娥「可以講：以前係（喺）立法會投票，你哋『泛民』係支持㗎。我覺得好驚訝」，仲標註咗「泛民都唔好扮失憶」、「你哋支持㗎」等。
網民「靜濤」就留言揶揄：「記憶只會隨佢地（哋）想做嘅嘢而出現，長期善忘係佢地（哋）嘅特性！」「John Cheung」就將矛頭直指公民黨：「假憂慮，譚文豪都係（喺）大灣區買樓住喇！」 ■香港文匯報記者 陳川