講就天下無敵嘅。民主黨嘅電話廷（林卓廷）喺競逐北區區議會石湖墟議席時，用「打擊水貨客不力」嚟攻擊時任當區嘅議員，結果贏咗。但佢當選後水貨客霸街執貨非但冇改善，情況更嚴重咗，搞到居民怨聲載道。今年係區議會選舉，電話廷就假惺惺喺區議會提出限制內地「個人遊」旅客來港次數嘅動議，結果被否決，佢就不斷喺fb宣傳話係建制派阻撓喎。有心水清嘅居民就狠批，話佢明知區議會議案冇約束力，電話廷只係因為選舉而忽然積極，完全係喺度做戲扮嘢。
水貨客充斥嘅問題已嚴重影響北區居民嘅生活，的確需要解決，但電話廷明知呢個問題唔係一時三刻可以解決嘅，亦諗唔到咩嘢有效嘅解決辦法，但就不斷用水貨客問題攻擊選舉對手，講到自己一當選問題就可以迎刃而解咁，結果呢？除咗「成功爭取」搬走咗個電話亭，等條路闊啲啲之外，仲做到啲咩？
區選近了 動議交戲
不過，今年係區議會選舉，明年就係立法會選舉，身為石湖墟區議員、新界東立法會議員嘅電話廷，就臨急抱佛腳，做嘢交戲。前一排，佢學「港獨」組織搞個「光復」行動，居民當然劣評如潮。本月中，佢喺北區區議會動議將目前「個人遊」旅客嘅「一周一行」，改為「一年八行」，話此舉係「針對上水水貨客問題」，解決市民嘅困擾。最後，動議俾區議會否決咗。
動議通唔通過其實唔係重點，自己交咗戲可以廣為宣傳先係重點嘛。所以，佢喺動議否決後即刻喺facebook出文，話自己個動議俾建制派否決咗，將水貨客問題個波拋去建制派議員嗰邊，仲整個成幅街招咁嘅圖些牙（share）去北區幾個fb專頁同群組想呃Like。
居民心水清：長拖長攞票
不過，居民係好心水清嘅。「Mavis Kong」道：「頭幾年唔困擾，今年選舉先困擾，講咩啫，做完show返去訓（瞓）啦！......我想講既（嘅）係，有心做好個區，所有諗到既（嘅）方案無論成功與否都一早應該嘗試，唔係驚早做選民唔記得，拖到去選舉年先做。明知區議會結果冇約束力，就係（喺）度做戲扮野（嘢）！」
「Barry Ng」狠批：「選舉年先嚟扮做嘢，當人傻仔？」「Hang Pn」揶揄：「水貨，係居民嘅困擾；選票，係議員嘅困擾。」「Sky Kwong」就心水清：「愈反愈多就預左（咗），選舉後又打回原形，反水貨最後都係唔拖（湯）唔水嘅居多，唔玩到唔拖（湯）唔水，選票又點會長攞長有？」
有人就回帶民主黨嘅林子健聲稱喺鬧市被擄走時，電話廷就傍住對方開記者會又咩又盛，結果有證據顯示林子健可能自編自導自演，被起訴報假案罪上庭時，電話廷就全程失蹤。
「Samuel Tong」追問：「黨友上咁多次庭，林議員有無撐過一次？」「Peter Tse」即道：「燙手芋頭，佢睬你都傻，上次跟車太貼，奶（瀨）左（咗）野（嘢）。」
「Doghi LI」就重提此前民主黨新界59人因不滿電話廷而退出民主黨一事：「59件乳鴿因你離巢，你政治前途已破產，今明兩年選舉期才忽然積極，收皮啦！」 ■香港文匯報記者 陳川