以「最資深議員」身份主持《2019年逃犯及刑事事宜相互法律協助法例（修訂）條例草案》委員會會議嘅民主黨議員涂謹申，喺首次會議上配合其他反對派議員瘋狂拉布，令會議未能選出主席，方便佢自己繼續把持會議、阻撓修例通過。前日，佢突然變得「好順攤」，聲稱唔會趁立法會到長三角考察時玩偷襲，並且決定喺4月30日舉行第二次會議，原來其中「有陰謀」。
在台灣謀殺案發生後，特區政府因應目前的逃犯條例並未涵蓋台灣而提出修訂。由於高等法院依法只能審理該案兇嫌的4項洗黑錢罪名，而兇嫌被裁定洗黑錢罪成，並會於4月29日宣判。有法律界人士就指出，洗黑錢罪名刑期介乎1年至兩年以上，計算兇嫌的羈留時間，可能在判刑後很快獲釋。因此，特首林鄭月娥及保安局局長李家超均多次強調，修例時間緊迫，希望議員理性審議。
涂謹申喺首次會議拉布後，決定喺4月30日舉行第二次會議。由中文大學「獨」講師劉正經營嘅「無神論者的巴別塔」，就發帖踢爆涂謹申揀呢日嘅「陰謀」。
帖中曲筆道：「有樣嘢你真係唔可以唔佩服涂謹申，好揀唔揀，佢就偏偏揀4月30日就逃犯條例修訂續會－知唔知呢個係咩特別日子？就係由台灣潛逃香港果（嗰）位殺人犯最早獲釋嘅日期：4月29日嘅翌日。」
佢話涂謹申好揀唔揀揀呢日，「即係同全香港市民講：『我就係特登放咗個殺人犯先開始討論修例，到時個犯走去邊都得啦，咁你仲搞修例仲有咩意思？』果（嗰）種諷刺嘅手法簡直妙到毫巔而我只能衷心拜服。」
佢揶揄：「原先你（涂謹申）早啲開會，都仲可以賴建制派慢手慢腳搞到條例趕唔切通過，𠵱家涂謹申咁做即係將放生個犯嘅責任揹晒上身；當然，呢個做法會唔會令到個受害者嘅家人覺得你響傷口上灑鹽、會唔會令一般市民覺得你班飯民就係明目張膽放生個殺人犯、建制派會唔會真係因為修例『再無意義』而最終拉倒放棄修例，就真係見仁見智啦......」
朱隊友（朱凱廸）亦喺fb發帖爆響口：「下次立法會逃犯條例法案委員會定於4月30日舉行，屆時已經知道台灣殺人案疑犯陳同佳的刑期。如果陳在四月廿九日已獲釋，謝偉俊可以考慮下趟渾水選主席仲有冇政治好處。」
為咗一己政治利益，反對派唔單止阻撓公義彰顯，更對此沾沾自喜，真係人無恥、則無敵呢句說話嘅最佳註腳。
■香港文匯報記者 陳川