■葉榮鬧港鐵職員怠慢，但被質疑「有人幫佢影相但無人推佢入車廂」。fb截圖香港的無障礙設施的確仍有很多需要改善的空間，但有政客故意借此製造新聞，更將矛頭指向基層打工仔，就未免太過分嘞。本身為一名殘疾人士、需要坐輪椅的工黨沙田頌安區議員葉榮日前發帖，聲稱自己喺深水埗地鐵站等咗半小時，都冇港鐵員工畀塊月台板方便佢架輪椅上車。唔少人批評葉榮所屬政黨號稱「工黨」，但就借意難為港鐵前線員工，更用親身經驗證明港鐵員工一直都會盡量幫殘疾人士，質疑葉榮自導自演，目的只係為今年11月區議會選舉而製造話題兼賣小強。
葉榮日前喺fb發帖，話自己喺深水埗港鐵站等咗超過半個鐘，都冇人拎返月台板幫佢呢位輪椅客上車，「港鐵職員究竟去左（咗）邊，要一塊月台板都咁難，救命！」「Yim King Lee」在帖下留言：「你每次都要在未上車時，通知職員就得，我都有朋友都是傷健人士，都很快。」葉榮就聲稱自己前一晚已通知咗港鐵，結果都係等咗40分鐘喎。
不過，好多人都唔信葉榮嘅講法，仲不滿佢明顯冇考慮到當時喺月台嘅職員，分分鐘會因為佢呢位「尊貴（區）議員」嘅投訴而俾主管責備甚至處罰，唔少網民都以親身經歷，來為港鐵前線員工抱打不平。
有人幫影相 無人幫上車？
「Chan Kwok Leung」留言時揶揄：「真係正，有人幫佢影相但無人推佢入去（車廂）。」「Hades Siu」道：「我之前試過幾次返工途中唔舒服，然後坐咗喺月台，都有職員會主動幫手，又斟水又幫我搵人接我走（我唔想叫白車） 前線員工真係好好！唔會話特登唔理人要人等。」
「Ray Luk」直言：「我次次坐地鐵輪椅人仕（士）上車有職員協助上車，目的地已經有另外職員恭候，你呢個議員鬼鬼鼠（祟）鼠（祟）咁，有人同你影相即係不用幫忙上車屈冇職員，好狗者（啫），影張相呃like！」
懶理站員解釋忙救流血客
「Kwok Suen Lee」就轉發其朋友的帖子，踢爆葉榮講大話：「此君（葉榮）並無和盤托出整個事件，當時站員正在替一流血不止的乘客按壓止血，另一站員call白車在路面等救護員，根本冇人手放板，職員已向其解釋正在救人中要稍等，然而似是未能令其諒解，還叫友人幫他拍照。」
他續說：「如果事件真的存在安全漏洞，恐怕當日如果職員放下流血乘客不顧，熱情招待尊貴的議員，肯定存有安全問題。今日我為何要為站員抱不平，因為看著（着）一些口口聲聲維護工人，做的卻是另一回事！」
「載空國際」fb專頁亦發帖批評，「口口聲聲話保護弱勢，維護工人權益既（嘅）政黨點解會留難前線員工？大家可以Google下（吓）乜野（嘢）叫『人血饅頭』，你懂的。」
真相大白，唔少網民都叫葉榮回應。「吳振宇」話：「工黨議員好尊貴㗎？你要人哋要放低其他工作服務咗你哋先？你唔見職員救緊其他人咩？仲要搵人幫你影相，唔叫其他人幫手推你入去，係唔係腦殘？」「Yvonne Shi」揶揄：「葉議員可能有視障，不發現有人流血不止需要急救 ，我以為通常做公職人士比較急人之急，原來我錯了，葉議員眼中只有自己和抽地（港）鐵水。」
網民批挑動群體矛盾呃like
「Boris Wong」就踢爆：「我親眼（睇）住你有職員幫你上落車，你唔該都冇句成個大爺咁。」「Vincent Man」勸告道：「好心唔好成日顧影自憐，覺得人欠咗你啦，做議（員）係可以，但唔係用一種挑動群體矛盾，或仇恨嘅方法去做，咁樣唔會得到更多支持，可能有反效果。」 ■香港文匯報記者 陳川