個個政黨都聲稱要關顧基層，唔通個個都真係咁關顧基層咩！工黨沙田區議員葉榮，非但難為港鐵的前線職員，仲曾經為咗選票而違反工黨嘅政綱。
話說舊年11月，有傳媒報道馬鞍山福安花園商場懷疑有人經營無牌按摩院，葉榮就即刻報警L上身，要求警方打擊馬鞍山富安商場內「黃色事業」。不過，工黨不嬲喺政綱度寫明「要求性工作非刑事化」嗰噃。
話撐性工作者又趕絕流鶯
「民陣」召集人、另名「燕夕」嘅岑子杰當時就發帖話：「我明白做地區工作，街坊對色情行業會有不滿，但不是就要去要求警方去打擊！（色）情工作在香港不犯法的！不犯法又執什麼法？加上工黨是支持性工作非刑事化的。......性工作也是基層市民！何必去趕絕基層呢？街坊是可以被教育的！我對葉榮的這次行動很失望！工黨也應嚴正處理！」
工黨主席郭永健當時即刻同葉榮劃清界線，話葉榮嘅言論不代表工黨立場喎。
李卓人用MPF對沖「無良」
其實，只要回帶一下，就發現工黨所謂關顧基層，其實都係得把口。工黨「要員」李卓人嘅辦事處喺2012年有3名職員離職時，李卓人就申請以強積金（MPF）計劃中僱主供款所得的累算權益，抵消長期服務金或遣散費，即係佢口中所謂「無良僱主」經常用嘅「強積金對沖」。
對自己人就「風吹皇帝褲襠（孤×寒）」，對唔使用自己錢嘅，就「非常慷慨」：職工盟同工黨一向都係積極為外傭爭取居港權，而李卓人更曾經提出過要修訂將外傭納入最低工資保障，為咗製造外傭票，真係不惜共享香港僅有嘅空間，仲有中產嘅血汗錢。
同時，李卓人用人唯親、甚至私袋獻金，工黨其他成員屁都冇放個。李卓人妻子鄧燕娥就曾任李卓人主導嘅職工盟總幹事，而其小姨鄧燕梨一直擔任職工盟培訓中心的行政總監。2013年10月，李卓人收取咗壹傳媒創辦人黎智英50萬蚊後，唔單止冇按議事規則規定申報有關個人利益，更將該50萬蚊存入自己戶口，「袋住先」近9個月，到事件被踢爆後先至將捐款本金轉回工黨。 ■香港文匯報記者 陳川