香港文匯報訊 由王梓軒、陳潔儀（Kit）主演，劉松仁（松哥）一手策劃兼導演及創作的音樂劇《利瑪竇》昨晚開鑼，挾着松哥聲勢，12場門票經已售罄，反應熱烈。由於是松哥閉關作，松哥認真得一絲不苟。前日總綵排上，所有演員全副武裝「踩台」。首次黏鬚上陣的梓軒即「利瑪竇」上身，並能講和唱意大利文歌，令松哥激讚：「好正！佢已經入咗魔！真係好睇！佢已經做得好好，唔使做到特別好已經夠睇，真係好睇！」
今次梓軒在音樂劇中，擔任非常重要的角色，為免不想影響到松哥的「金漆招牌」，他為今次演出秘密練兵，除了花4個月時間進行密集式排練外，他更學拉二胡及進修意大利文，壓力甚大。梓軒說：「綵排時，技術上係出咗啲問題，不過，大家都好一條心，就算有啲乜嘢出咗事，我哋都會一齊去補位，就算做得好好時，佢哋都會幫你更上一層樓！」
Kit說：「雖然技術上問題嗰一刻係會覺得『唔係呀嘛！』但更加有鼓勵性，就係全體演員都上下一心，無受技術問題影響！深信呢班團隊係得嘅，有幾大嘅問題我哋都會克服，呢12場希望唔會再發生呢啲嘢啦！」
利瑪竇是意大利人，梓軒要由他的28歲演到57歲，他於劇中有多個造型，戴上頭套、假髮及黏滿鬍鬚，造型維肖維妙，在台上演出時，整個人都散發出老外味，就連眼神亦交足戲，連松哥都忍唔住高舉手指公大讚。
而Kit飾演的女僕麥小妹，對她來說亦有一定難度，綵排時，Kit為了符合角色設定，更長期彎曲身軀去演及唱歌，不過身為新加坡歌后，當然難不到她。