■家燕姐一臉倦容現身。香港文匯報訊（記者 梁靜儀）薛家燕、陳敏之、李彩華（Rain）、吳國敬、關楚耀、王灝兒（JW）、Joe Junior 及魯振順等前晚於電視城錄影《流行經典50年》。家燕姐近日到內地商演，在當地食完生蠔後疑食物中毒，返港後又屙又嘔，更在浴室暈倒約兩分鐘，醒來後發現臉朝浴缸底，幸當時浴缸沒有水，否則後果不堪設想。
家燕姐一臉倦容現身，她透露疑因食物中毒搞到又屙又嘔以致狀態欠佳：「母親節嗰日返內地做商演，主辦單位請我去餐廳食西餐，我食咗啲生蠔，第二日返嚟香港個胃同個肚就好唔舒服，屙嘔咗好多次。有一次我忍唔住嘔咗落浴缸度，到醒嘅時候發現自己塊臉對住個浴缸底，隔籬就係啲嘔吐物，手腳麻痹，休息咗好耐至開門嗌個女工人，我個女話聽到聲，以為工人打掃時發出啲聲音，我諗都暈咗有約兩分鐘，好彩個浴缸冇水，如果有水我就浸咗落去。」
她謂事後去了看醫生，並勸喻大家飲食小心，夏天最好吃熟食，留心生食有沒有變壞。因病減磅的家燕姐笑說：「好多人都話我瘦咗，六月尾喺澳門嘅演唱會，謝天華一定抱得起我啦。」談到她的拍檔黎小田早前因患肺炎入院，家燕姐透露對方已出院：「應該冇乜嘢，現在休息緊，佢都話好掛住大家，但就未知佢幾時復工。」
Rain已一個月沒見老公
人妻Rain大騷長腿亮相，並獲好姊妹陳敏之送上自家品牌禮餅祝賀新婚。Rain表示最近正忙於內地、澳門拍攝慶祝澳門回歸的劇集《彎彎的大灣》，劇集趕於年底前推出，因劇組轉地方拍攝，所以才有空檔回港幾天。她表示今次再夥拍羅嘉良，是繼十幾年前的《昭君出塞》後再合作，當年他們扮演情侶，今次則扮叔姪，其實他仍保養得好好。待完成劇集，她會返港參與一個大型舞台劇，屆時將要一人分飾三角。
新婚不久的她，表示婚後與老公均忙於工作，已有一個月沒有見面，每天只能靠視像通話維繫感情，她笑說：「以前拍拖視像通話都止到，但結婚之後就止唔到，好想掂到老公，已經約好月尾見面。」她又自爆婚前說話時似大家姐，現在老公面前變小鳥依人，「聲線高八度好嬌柔，老公當然好受落，不過朋友聽到就嘩一聲， 震一震， 自己聽返留畀老公啲聲帶都頂唔住，但講出口時好自然。」
談到造人大計？Rain打算明年才展開造人計劃：「以前好期待生仔，但見到朋友生仔多顧慮、變緊張，自己都開始驚，我對入醫院有少少恐懼。雖然未大肚，但已經研究順產還是開刀。」
吳國敬對女友又愛又怕
吳國敬自爆因聲帶發炎，以致聲沙沙：「我打咗類固醇針才上節目，其實我唔想打針，因為會影響骨頭變脆，同埋原本係唱《是否》，但怕應付唔到故改唱《其實我深深愛着你》，等星期六再來補飛唱《是否》。」他透露正籌備推出個人第一首國語歌：「之前我出完發燒碟，畀粉絲投訴冇新歌、食老本，於是一不做、二不休就決定出新歌，仲請到當年《玩火》的監製幫我做。」
問到他「安心事件」後可有聯絡好友許志安（安仔）？吳國敬表示有發短訊慰問安仔：「冇見面，搵唔到佢，唔騷擾佢喇，畀空間佢去處理啦，無論如何，我哋係識咗好耐嘅朋友，會支持佢做好之後嘅事，過去嘅唔提喇，放眼將來。」他指都有問候鄭秀文，簡單留言一句就夠：「作為局外人唔敢畀太多言論同意見。」
問到他又可有遇過誘惑？ 吳國敬坦言有很多引誘， 行內行外都有：「我個底幾好，冇乜緋聞，可能我怕老婆（女友）啦，我嗰件都幾巴辣，係辣椒仔，對佢又愛又怕，雖然有幾多誘惑，但我都把持到，希望唔好突然衰。」被追問到何時才跟女友結婚？他聞言即笑說：「一係唔搞，一搞就連百日宴一齊搞，（女友有咗？）有咗......共識，雙喜臨門，講住先啦，佢未肯嫁我，要我寫多幾首冧歌畀佢先。」