■朱晨麗香港文匯報訊（記者 李思穎）朱晨麗(朱朱)現正忙於拍攝民初新劇《大醬園》，外表斯斯文文的她，說話陰聲細氣，原來「劈功」有一手，在拍攝「劈」柴一幕時快而準，就連猛男韋家雄都甘拜下風。
朱朱在劇中每天都勤奮生活，要踩着三輪車送貨過活，又要劈柴，忙於趕戲睡眠不足之下，她依然狀態大勇，拍攝「劈」柴時，三扒兩撥就將柴劈開，全劇組都睇到目瞪口呆，難怪她得戚說：「連韋家雄都劈唔到呀，道具手足見韋家雄劈極都劈唔開條柴，就同佢講『叫Morning朱幫你劈啦，佢好叻』，唔知點解劈柴對我嚟講，好似有特異功能咁，一Take過，好勁呀！」最搞笑是之後韋家雄又要再劈柴，他繼續劈唔開，在場工作人員笑言叫韋家雄搵朱朱做替「手」幫他拍劈柴鏡頭，大家都很佩服這位「劈」柴聖手！
朱朱在《大醬園》中擔正女主角，每日都要開工，但早前她的經理人收到《法證先鋒IV》劇組通知，因為黃心穎被換角，朱朱的戲份都受到影響要重拍，她即將要面臨同時趕拍兩部劇集的噩耗，因為《大醬園》是民初劇，《法證》則是時裝劇，連同轉妝頭、造型、轉場及拍攝，朱朱即將陷入日接夜、夜接日地瘋狂拍攝狀態，她愁爆說：「收到重拍消息後，心情即刻沉晒，即刻問《法證》嗰邊，我有幾多場口要重拍？但未獲回覆，而《大醬園》講我一個女人打拚撐起頭家，幾乎場場戲我都有份，如果兩邊一齊開，只得一、兩個鐘休息時間都要拍埋，到時要日接夜、夜接日，肯定冇得瞓覺，好擔心身體會負荷不來撐不住！唯有給公司去處理，等候發落，相信公司會有一個最適合的安排！」朱朱表示好多年沒放假，之前拍《法證》已經拍到五癆七傷，現時最希望拍攝順利完成，可以讓她休息一下去調養身體。