■堵路者滿口歪理，圍攻欲前行的市民。 fb截圖反對派一句要「示威」，就連續多日擾亂社會秩序，部分人仲盲撐佢哋「文明理性」。不過，網上近日就瘋傳一段有市民唔知想入灣仔稅務大樓定入境大樓嘅短片，片中有個着住件「自由×」短袖衫嘅阿嬸，激動咁同個市民對鬧，之後仲有個後生仔「幫拖」，話棟樓係「英國人起嘅」，個市民唔係英國人就「咪×行入去」，之後仲有個師奶出埋嚟鬧個市民做「死八婆」，叫佢「返大陸」。嘩，真係「文明理性」到嚇死人。
歪理阻門口 「英國人先畀入」
事發地點就喺灣仔入境大樓同稅務大樓出面塊空地度，有市民疑似不滿啲「和平理性示威者」唔畀人入去，於是就同佢哋理論。不過，有個阿嬸就不斷鬧佢，個市民忍唔住反問︰「棟樓你起㗎？」
呢個時候，就有個後生仔出嚟指手畫腳，同個市民講︰「棟樓係英國人起嘅！你係咪英國人啊？......咁你就咪×行入去啦！」然後又有另一個師奶出嚟叫個市民「返大陸」。個市民似乎都意識到無辦法同佢哋「理論」，於是就轉身離開，但班示威者依然咬住唔放，又有個示威師奶亂入鬧佢︰「犯賤！俾人鬧！」
唔少網民都鬧爆示威者嘅不文明舉動。「Amy Lo」話︰「你地（哋）人多蝦人少。重（仲）不停用粗口鬧人，又話和平？我睇唔到羅（囉）。」「Ophelia Pang」亦話︰「好恐怖，以為只有『已完（議員）』同廢青質素惡劣，連師奶都咁，究竟咁多香港人為左（咗）D（啲）咩連自己人格都唔要？」
亦有人反駁「英國人起嘅唔准入去」論。「Veronica Tong」揶揄︰「英國人起就唔可以入去，但香港九成建築物都係中國人起，連佢踩住個地下都係中國人舖，啲『自由×』要飛先得喇。」「CM Vong」怒斥︰「香港是中國的地方。吾（唔）係中國人吾（唔）好留係（喺）到啦！返英國做下等人啦。」「Sunny Lau」就話︰「睇吓嗰啲盲目支持呢啲人頂得幾耐。」■香港文匯報記者 甘瑜