■祖兒跟嘉賓草蜢合唱《失樂園》。香港文匯報訊（記者 李思穎）容祖兒（Joey）休息一天後，前晚再「復工」進行第十五場演唱會，除了邀得草蜢擔任嘉賓外，更吸引到本月底便踏入88歲的《真情》「容姨」譚倩紅前來捧場，令Joey喜出望外，笑言他朝自己步入「容姨」80之齡仍如此精靈，必定繼續開騷！
當晚有不少圈中人前來捧場，包括吳君如、薛家燕、陳潔靈、陳慧嫻、湯寶如等。狀態大勇的Joey開場未幾自爆瘀事：「今日出場前不知何解被反鎖於廁所，要人來救才開到門。」隨即叫全場「集氣」驅走負能量，引來叫喊聲不絕，全晚瘋癲大合唱，high爆紅館。
嘉賓環節時，Joey抵死指：「連日來不同職業都有出現，有農夫呀個啲 ，今日係昆蟲類，有三隻，有一個跳舞跳到開學校，有個跳到頭髮長過我，有個跳到扭下擰下遲些仲自己開演唱會，有佢哋的地方好似開party咁開心。」
祖兒 傑仔打情罵俏
草蜢現身舞台跟Joey合唱《失樂園》，繼而因Joey點唱，再合唱《ABC》，唱畢後，Joey先恭喜蔡一傑（傑仔）即將開個人演唱會，更主動請纓問傑仔要否請嘉賓，豈料傑仔尷尬問：「你係咪好想，我有個空缺，玩另類做下和音？」Joey呆一呆話，「我唔熟喎。」點知傑仔再開口夾着脷：「 我諗下......」祖兒聽到「諗下」即刻大笑，傑仔成頭汗解釋：「我唔係推你意思呀，你來我絕對歡迎，咁大家記住來睇啦，有Joey呀。我係吾好意思呀，你作為一個天后級！」Joey即說：「你咁難得自己開演唱會，點需要唔好意思呀你！你又係小嘢咩！你都係Diva！」
Joey又聽到傑仔讚她身上所穿的衫好靚，更對他說：「你摸下！」傑仔笑說：「我摸邊度啫？」祖兒笑住話：「我哋有咩所謂喎，你想摸邊度？」引得觀眾哈哈大笑。蘇志威（蘇老闆）說：「你哋有本錢打情罵俏，我就唔可以做啲咁嘅嘢......」Joey又轉向仍未開腔說話的阿智：「阿智都未講嘢，通常阿智講啲嘢最有智慧。」阿智便爆Joey行山時的有趣事：「爆少少祖兒crazy嘢畀大家聽，有一次去行山，路線圖好崎嶇，有一段要行落馬路，我仲諗緊佢貴為天后怕唔怕，點知佢竟然雀躍起上來，仲喺馬路上面單腳彈彈下，又話好開心，咁大個女未試過喺馬路行，好crazy囉。我幾驚佢被大巴士撞。」
不過要論當晚最crazy的應該是年屆87歲高齡的《真情》「容姨」譚倩紅如同小粉絲現身觀眾席上，企正第一行的她跟着Joey一齊唱，又等握手，非常投入，難怪Joey事後在社交平台興奮留言：「真係容姨呀！我喺上面一路唱一路望一路諗，幻覺嚟㗎啫，容姨無理由識我㗎，不過唱到最後一首歌，我就好肯定嘞，我哋仲握握手𠻹，好開心呀我。話時話，我到了80歲嘅時候都會係容姨㗎啦噃，如果到時仲可以咁精靈一定繼續開騷，驚你唔嚟咋。祝譚善（倩）紅姨姨身壯力健每日平安快樂！笑聲笑聲滿載溫馨。」