呂健威馬房向來予人明刀明槍感覺，投注此路人馬有唔少執生位，可助提升命中率。上季呂廄共錄得三十一場頭馬，當中全數來自草地賽，田草十七場及四場谷草，而泥地賽事方面，共出爭三十五次最終只兩度獲季，未曾贏過之餘更未有入Q紀錄，或許是旗下欠缺泥地性能特佳分子，戰意當然一般，所以喺泥地賽避開此路人馬，可慳番唔少子彈。此外，尾場賽事亦成為追捧呂廄馬之關鍵，事關上季呂健威馬房就喺尾場賽事取得八冠五亞兩季，勝出率達16.3%，上名率30.6%，勝出率排於練馬師榜第二位，其中「威進駒」就兩度為練者於尾場取得頭馬，此路人馬值得優先留神。
呂健威作風平實，旗下馬匹大部分以中下班次為主，但上季就出現過不少優質新血，「金鎗六十」、「幸福笑容」及「勝利風範」等C布馬，於出道首季已取得不俗成績，前景可以話一片秀麗，加上「蟲草之星」、「非凡品味」及「傳盛」等具實力分子，牠們正處於當打之年，預期可為馬房帶來一定頭馬數字，要打破上季三十一場頭馬紀錄不難做到。
練者上季與何澤堯加強合作，全季三十一場頭馬當中，有廿場就由這位華將一哥取得，騎練合作共獲廿冠廿一亞十五季，勝出率達12.4%及上名率34.8%，成績亦見相當穩定，只要繼續保持良好關係，預期仍是馬房今季倚重的騎師。