盃賽場合多數編高班，而且多數係實力高馬佔多場合，所以理論上係熱門佔優，不過凡事都有例外，好似上季就有三隻巨冷馬捧盃。最令人印象深刻一定係四歲系列賽次關嘅「妙算達人」，當日廄侶「達龍駒」同「添滿意」兩隻較熱，呢匹梁家俊坐騎冷到九十二倍，喺鞍上人且放且留之下，「達龍駒」追極都追唔到，最終爆出冷門。另外姚廄「旌暉」一向係性賦忠心的好馬，總場次三一四場突然縮落一千米直路賽洋紫荊短途錦標，沿途包大尾下竟可在最後一百米撲上，六隻馬場合都爆九十倍。仲有一匹就係航哥灰馬「盛勢」，對上兩仗都在谷草一哩大敗，但跑香港欖球總會盃一役忽然神勇，爆全季一百六十七倍最冷W。另外，「美麗傳承」一連兩季做馬王，剛季仲要破紀錄八度取勝前無古人！而且佢八場頭馬全部係大盃錦標，好似國際賽香港一哩錦標中，就喺老拍檔潘頓胯下行返嚟贏；另一場董事盃三冠大賽頭關，就以三馬位贏「以奇用兵」，贏到無得跑，翌仗女皇銀禧紀念盃千四米則力挫「爭分奪秒」；到季尾冠軍一哩賽，再以無敵姿態輕取「星洲司令」，總結四勝一級賽、三場二級賽及一場三級賽，難怪獎金破到「爆冷」紀錄了。