在香港做馬主越來越易，若是團體馬成員又或者加入競駿會，門檻比以前寬鬆好多，不過最有錢嘅一批頂級富豪，當中唔少現時仍為馬主，睇番今年福布斯榜公布嘅香港頭五十位富豪排名中，有幾多位富豪或其家族成員有養馬？不如逐一睇睇吧。新世界主席鄭家純擁有三匹名下馬，分別為「同樂日」、「奇妙日」同「美妙日」，「同樂日」呢匹前德國二千堅尼亞軍馬，來港兩年仲未打開勝門，至於喺英國跑過三級賽的「奇妙日」，出道十五仗亦未曾入Q，「美妙日」則是出賽一次未勝新貴。
理文造紙主席李運強即「包裝」系掌舵人，現時並無名下馬，但佢位公子李文斌有「包裝才子」及「十五十六」服役中，前駒為法國打吡第五名，至於「十五十六」則是三歲新馬，新季就會同大家見面。有「屏幕大王」之稱的富豪楊建文，名下馬大多以「錶」字命名，例如四捷馬「錶之勝」及「錶之星」等等，現役馬則有「錶之太陽」。最後輪到高銀集團主席潘蘇通，相信馬迷唔會陌生，此件黃底紅波綵衣，昔日曾有「事事為王」攻下香港盃及香港打吡大賽，同期的「大運財」也是多項級際賽冠軍，之後「大印銀紙」也是董事盃盟主。潘蘇通現時得一匹英國表列賽冠軍「大金庫」服役，此駒上季曾經在二班千六米拚入亞軍，今季料可打開勝門。