潘頓夾羅富全有個數據大家一定要知，騎練上季至今合作八十八次，成績是二十二冠十四亞十一季，落第則有四十一場，上名有四十七場，即係講上名率超過一半。今次潘頓替羅富全馬房的「超級綠洲」披甲，初出澳洲自購馬，來港前贏過三場，路程分別是千二米、千六及二千一米，後兩場為二級賽，不過這均非最代表性的賽事，原來三捷後，這駒曾進軍今屆紐西蘭二千四百米打吡一級賽，取得一席第五名，其後再出席澳洲二千四百米打吡，亦取得第三名，兩場打吡俱見走得近，來港即被評八十八分起步，基本上只要來港後有表現的話，即有資格進軍今屆的打吡大賽。今次初出跑千六米，路程當然嫌短多少，但畢竟以這駒的實力，只要適應水土無問題，二班爭功是具有一定優勢，而再從這駒的備戰角度來看，潘頓可以話最緊張，在八月份開始備戰至今，這駒彈過三課大閘，這三課大閘，潘頓從未缺席過一次，每次均是親力親為替牠考驗。第一課大閘是在十月中，試直路賽得第三名，頭二馬分別是「行星夢」及「鑲藍旗」，「超級綠洲」在潘頓按韁下得第三名，只輸一個身位給頭馬「行星夢」，第二課大閘在十一月初，又是試直路賽，鞍上人潘頓又是按韁輸半個身位給「忠心勇士」。最近一課是在十一月尾，試千二米泥地大閘，今課順利勝出這組大閘，以近半個身位贏「都靈紅星」，結合「超級綠洲」三課大閘，角逐千六米已有一出即勝本錢。