今年已屆七十歲的大摩，近日又向傳媒放風，希望馬會以佢哋摩氏家族在港的貢獻，能夠俾佢玩多一季，當然，馬會早前已表明七十歲已是當練馬師的極限年齡，不過有時政策嘅嘢，未必會一成不變。當然目前對大摩來講都是希望，能否達成仲要時間努力爭取，而當前最緊要都是交回一定成績，近期大摩馬無論大場或細場，只要馬匹谷起狀態便搏殺，正如「壽臣」沙田千四米出擊失敗，轉跑谷草千二米，用潘頓排十二檔照贏，如今大摩的戰馬經已陸續谷起，亦是交成績的時候。今次夜賽，大摩一批列陣馬中，最睇好便是新升班的「萬眾之力」，季內兩戰四班谷草一千米全勝，此駒其實季初經已操好，馬房安排牠跑一千米直路賽，因為上季曾兩度在此程入位，馬房摸住石頭過河，諗住最初安排回這個路程求成績，但效果一般，事後利敬國建議倉主，不如試跑窄場，大摩果然言聽計從，季內翌仗便跑谷草一千米，即使臨場是十八倍冷門，在利敬國胯下竟然輕易爆出，證明利敬國的眼光沒錯，不過，馬有時亦要看人發揮，未幾再出，馬房安排這駒跑國際騎師賽配田泰安，以為可以再度輕勝，鞍上人卻只交出位置，結果最近一仗交回利敬國才能再勝，未段半按韁姿態，真正實力仍未盡露，今次升上三班依然用利敬國，更難得是排一檔，前速飛快之馬今次減了十三磅，以其條件有望再下一城。