唔少噏唔出名嘅政治素人今次成功靠「五大訴求」嘅口號成為區議員，令到連入閘資格都冇嘅「中箭」（香港眾志）改變策略，日前宣佈刪去令佢哋入唔到閘嘅「自決」主張。呢種咁嘅政治投機，當然都引嚟好多人不滿，其中中文大學「獨」講師劉正就喺facebook出文踢爆，話「中箭」明明上星期三就已經開咗會，偏偏到上星期六先宣佈，明顯想借台灣地區選舉沖淡自己嘅新聞，揶揄佢唔再「自決」嘅做法肉酸，「但無所謂啦，所謂『自決派』支持者其實從來都唔知自己支持緊啲乜，聽日話你聽『眾志』同民主黨合併呀，呢班懵炳咪一樣照撐。」又好似係喎。
等台灣選舉日公佈博沖淡
「中箭」日前宣佈將綱領入面嘅「推動香港民主自決」刪走，並改為「推動香港的民主與進步價值」，仲稱咁樣可以「更概括闡述『眾志』的工作方針」喎。
唔少人對於一個黨組織可以話改目標就改感到不滿，驚佢哋一跪再跪。「無神論者的巴別塔」就以《普天之下，再無自決》為題出post，首先就踢爆「中箭」鬼祟遲幾日先公佈，企圖沖淡件事，跟住就剖析點解「中箭」要忽然唔「自決」，「『自決』呢兩個字從來對於『香港眾志』都係最大負擔，令佢哋所有候選人都籠罩響DQ陰影之下。」今屆區議會選舉，有部分退咗黨嘅前「中箭」成員都入到閘，「巴別塔」就話︰「（中箭）為咗向『特衰政府』展現善意，以求響之後嘅『垃圾會』選舉保持出選不被DQ嘅機會，進一步自閹係必然嘅一步。」
「巴別塔」揶揄，「中箭」一邊叫「香港人，反抗」，「自己卻先跪半截先，唔覺得好肉酸架（㗎）咩？講到尾，『香港民主運動腐化根源就係選舉』呢一個特點從來無變。」佢仲預先酸埋班「中箭」支持者話︰「但無所謂啦，所謂『自決派』支持者其實從來都唔知自己支持緊啲乜，聽日話你聽『眾志』同民主黨合併呀，呢班懵炳咪一樣照撐。」
唔少支持開「中箭」嘅人就想改變輿論，喺fb同「連登」網上討論區都發聲安撫班「港獨」手足，想佢哋接受「中箭」「扮跪」喎。「蒸發的世界」就琢磨佢句「香港的民主與進步價值」問︰「咁含糊，『港獨』會唔會都係令香港進步既（嘅）價值觀？」「Dick Wong 」就問「唔喺（係）將台灣的民主進步黨（民進黨）個名，變做自己『眾志』的宗旨呀？」
新口號玩含糊被譏行「棍路」
不過，多數人都睇得相對簡單直接，「木木木木梟」就笑言，黃之鋒佢哋年紀都唔細：「開始大都要搵飯食。」「Szeyam Lee」就道出殘酷嘅現實：「自我檢查做事無（模）寧（棱）兩可，不能貫徹始終，兩邊不討好只是為了議席，年青（輕）人咁快做政棍！」■香港文匯報記者 黃書蘭