呢排正常人都保持社交距離，個個宅在家抗疫都係想疫情快啲完結，但身為立法會議員嘅公民黨陳淑莊日前同黨友林瑞華等約40人，喺深水埗落半閘嘅酒吧聚集，涉嫌違反「限聚令」，俾社會批評佢呢個時勢仲一班人蒲吧。不過，陳淑莊噚日就死口唔認犯法，不斷詭辯自己「去酒吧開會」喎，全國政協副主席梁振英（CY）噚日都喺facebook質問陳淑莊同林瑞華「有冇腦㗎」，「聚集的不是十個八個人，是40人，想製造另一個酒吧疫症群組嗎？認錯道歉吧。」
揶揄掛Private牌可防疫
CY噚日喺fb連續發文，指陳淑莊同林瑞華等40幾人喺幾百呎酒吧聚集，仲想賴係新規例「唔清晰」，形容呢啲「酒吧開會」嘅狡辯「有冇腦㗎」。佢向有關人等問3條問題，一係當晚「開會」有冇飲酒，二係當晚邊個埋單，三係有冇講過立法會選舉。
佢仲出咗個post揶揄陳淑莊同林瑞華嘅「防疫大法」，話佢哋套「大法」只要喺門口掛「Private（私人）」，咁就可以「病毒免進」，同埋用唔同顏色、味道嘅酒精「??口」。為免市民有樣學樣，CY強調︰「此法只適用於有公民黨立法會議員『加持』的酒吧，否則會一傳40， 40傳1,600......醫院爆煲。」
唔少網民亦紛紛留言鬧爆陳淑莊、林瑞華講大話。「Fu Tsun Hung」︰「如果她堅持自己作為議員，可以豁免，可以說是認知上的錯誤。當轉口批評法例不清晰，就明顯是狡辯，就連初初提出的理由，亦是籍（藉）口，這就是道德誠信的問題。不過我明白和政棍講道德誠信，是沒有意思。」
「Ju Ju Hung」就批評陳淑莊身為大狀都目無法紀︰「牠（她）身為（大）律師， 竟然話規例唔清晰？聽到政府呼籲聚集唔可以多過4人，普通市民就算唔識法律都識啦，牠（她）明知故犯有錯唔認仲講歪理，應該踢佢出議會啦。」
「Cho Chi Wan」又揶揄舞台劇出身嘅陳淑莊︰「詐死扮可憐搏（博）同情演技一流，扭曲真相係佢強項！佢認錯好難啦。」「Happie Lam」亦都明白陳淑莊呢鋪真係心虛啦，「反口覆舌，巧言令色，卻又無法自圓其說，這是典型的心虛。」
緩刑期間犯法 或要返去坐監
「Danny HK Tang」就指出，陳淑莊之前「佔中」單案係判監8個月、緩刑兩年，如果佢緩刑期間干犯可判囚罪行，就可能要坐返監，並以公民黨黨魁楊岳橋嘅「金句」揶揄道︰「身為大律師的『陳已完』知法犯法、一再挑戰法律，必須立即檢控並勒令『陳已完』坐完8個月監禁。她的人生會更加精彩。」 ■香港文匯報記者 郭家好