多名「女手足」出聲明爆料 疑犯反咬：再唔滿意用命回應
黃圈真亂唔係講笑。俾啲黃絲追捧嘅大埔「連儂畫家」，早兩日被多人踢爆原來係男女通食嘅變態色魔，唔單只喺所謂「連儂牆」騷擾多名「女手足」，仲傳人獸交照片畀所謂「男手足」，更屢屢喺群組發表色情言論。多名所謂大埔「連儂隧道義工」出聲明爆料，要個「畫家」道歉。不過，嗰位「畫家」先係反咬、恐嚇，企圖掩蓋事件，最終喺噚日發咗篇「道歉聲明」，但就辯稱呢啲係自己常用嘅溝通方法，冇非禮任何人，更放言如果啲人仲唔滿意，佢下一個回應，就係自己嘅生命，聽落都幾嚇人。■香港文匯報記者 文根茂
所謂大埔「連儂畫家」，獲醜聞纏身嘅藝人阮民安，同埋違反《商品說明條例》、造謠抹黑警察嘅黃店大埔鼎天茶室（見另稿）大力支持，包括喺鼎天售賣撥扇，亦都會將啲文宣作品擺喺大埔所謂嘅「連儂牆」展示。日前，佢就被爆出非禮醜聞。
「女手足」：借睇直播愈靠愈近
「連隧義工包書膠」頭兩日喺facebook發帖爆料，形容呢位所謂「連儂畫家」簡直係變態人渣，指控佢喺大埔連隧期間非禮「女手足」，有「女手足」話佢借睇直播之名愈靠愈近，繼而碰到其私人部位，之後亦有同樣事件發生。
同時，有其他「女手足」都控訴話俾佢掃膊頭及手臂；有「女手足」話喺夜間時分，大家喺隧道坐低飲酒，對方貼到佢身旁，佢馬上後退並大聲問「連儂畫家」乜事，對方只sorry以對，最後走嘅時候阿「畫家」仲掃咗吤k邊屁股一下。
「連儂畫家」仲喺唔同社交媒體對男女「手足」性騷擾。佢上載截圖證據，包括以嗰畫家照片為頭像嘅WhatsApp對話截圖，內容係佢傳畀對方一張人獸交照片。「包書膠」話，實際佢所傳嘅照片及影片均有，對象係唔只一位「男手足」。
「包書膠」話自己起初喺「連儂畫家」與鼎天茶室合作售賣手繪撥扇帖文處留言，但就被佢哋全部刪除，唔知係唔係想當冇事發生。但「包書膠」就上載返啲留言截圖，發現「連儂畫家」係睇到啲指控並反擊，更誤將佢認成某位「女手足」而人身攻擊，話人40幾歲失婚瘋婆，三名子女不屬同一名父親，自己品味受嚴重侮辱，又爆出「手足」姓名「攬炒」，聲言要人哋拿足證據，仲話要叫Tommy一起直播「玩就玩大D（啲）」，又話已約好同鼎天老闆講，十分理直氣壯。
「男手足」指「畫家」曾私下傳色情圖
之後，好多義工都企出嚟爆料，「連儂隧道義工」仲發表聯署聲明，指責佢非禮行為，包括經常喺群組發表色情言論，屢勸不改，有「男手足」反映「畫家」曾私下傳送色情圖片畀佢，最終「畫家」被管理人從群組除名，又爆出佢誣衊義工丟棄其畫作，不斷要求義工交還4幅作品給他，亦都有其他義工發表獨立聲明質疑佢食「人血饅頭」。
不過，就算啲黃絲做得幾過分都好啦，都會有人死撐到底，「Ben Ben」仲詭辯「係咪以前犯過刑事案底，道德有問題，都唔適宜參與呢場『運動』？」不過就被人反駁，佢係𠵱家借運動解決個人私慾。
喺唔同人嘅圍攻追擊下，「連儂畫家」噚日就喺Instagram出咗個道歉聲明，話近日大批言論指責佢喺半年多前，喺連儂牆義工群閒聊中嘅言論令「女義工」產生不安，佢正式「道歉」，但就堅稱自己「只是慣於自己朋友也是常用這種溝通方法」，未有想非禮任何人，之後就話大篇幅講件事同鼎天無關，之後停止同鼎天、大埔嘅文宣活動，最後又留言話：「如果你們仍然不滿意，我下一個回應，就是我的生命。」