特區政府向全港市民派「銅芯抗疫」口罩，在登記基本個人資料後就會寄到市民家中，但公民黨黨魁戇橋（楊岳橋）同幾個泛暴區議員就老屈登記一事係政府要攞市民個人資料，要大家「考慮清楚」再登記，或6月6日之後自己去郵局拎。眾多網民喺戇橋帖子下笑佢低智，政府怎可能冇市民資料。
政府宣佈向全港市民派發布口罩後，泛暴派第一時間就是抹黑口罩是由立法會主席梁君彥胞弟開設的公司製造，是「利益輸送」，政府昨日已經澄清咗。不過呢，泛暴派就再提出一啲「隱憂」，講到底都係針對政府啫。
其中，戇橋前日喺facebook「提醒」市民，話「向陌生人提供個人資料時需分外小心」，又話登記申請口罩個網站嘅「資料收集目的」第四點指，「出於上文第1項所述的目的，或在你的同意下，或在法律授權或要求披露的情況下，此登記中的個人資料可以向相關的政策局、部門、機構披露」，但網站冇講邊啲係「相關」政策局、部門、機構，仲可能係警務處喎。
佢仲叫大家要好好保護個人資料，「若非趕住用，不如6月6日之後親自去郵局領取更好。如果嫌個罩肉酸，拒絕領取也是可以的。」
公民黨區議員：可幫你
不過，諷刺嘅係，既然咁「危險」，同屬公文袋嘅葵青區議員譚家浚點解一面話政府會收取個人資料，一面又話「你堅持要拎，我哋可以幫你」呢？
沙田區議員鄭仲恒亦話，好多「專家」都質疑口罩效用，個網站嘅私隱政策聲明又無保障，唔會主動幫街坊登記，但若街坊「好想要」，佢都會幫忙登記。咖喱范（范國威）、關永業、任啟邦更開始幫街坊登記「攞資料」。
就連同屬泛暴派嘅「自由系--區議會資訊平台」fb專頁亦發帖寸晒成班猛咁宣傳如何申請政府口罩嘅泛暴派：「二月嗰陣講（口罩供應）價低者得又話人戇居，而加直接拎八億落去買又話人利益輸送；嗰頭話完人哋個口罩無用，樣衰，𠵱頭又教人點申請！」
陸頌雄：唔好攞一萬蚊
工聯會立法會議員陸頌雄就喺fb發帖嘲笑楊岳橋等泛暴派「低智」，「喺度提提楊岳橋：有樣嘢，叫做香港身份證（常識嚟嘅！），入邊有齊晒個人資料。政府如果想攞個人資料，查張身份證就得，何需叫人登記咁麻煩？」帖中仲標註「咁驚就唔好登記選民」、「唔好攞一萬蚊」、「連身份證都註銷埋」。
工聯會新界東辦事處鄧家彪發帖寸戇橋：「嗱，七月就派一萬元，好大嘅陷阱，『手足』記住唔好申請。」
網民「Elaine Roberts」則直言，佢話網上登記時要填嗰啲資料向來都有，冇咩特別，「而且去郵局領取就唔使登記個人資料啊，唔會掛！」但網民「Villager SK」仍信咗戇橋，覆佢話：「起碼唔使畀地址先。」「Elaine Roberts」即「驚呼」：「吓，政府點會冇我哋地址啊，唔係點交稅啊！」「David Yeung」質問：「咁遲下一萬蚊係咪都唔好申請？登記選民呢？」
「Lee Kinshing」就形容戇橋係無腦律師：「有攞身份證，旅遊證件，八達通，信用卡，交稅，政府及第三者已掌握晒啲個人資料啦！就算去申請個手機電話號碼，都要ID卡同地址證明啦！」「Ming Chi」更道：「啱呀，之前黃營賣口罩都要人填咁多嘢㗎，點解當時你唔出聲呀，反骨仔。」 ■香港文匯報記者 杜思文