自從班「黃納粹」做咩都要分「黃」、「藍」之後，佢哋就提出咗驚天動地嘅「黃色經濟圈」，「五一勞動節」仲搞咗個「黃金周」做噱頭谷消費，點知佢哋自己個問卷調查就顯示，原來之前74.1%受訪者每星期幫襯「黃店」零次咁多，真係震驚14億人。「獨人」黎耀駿明顯接受唔到事實，憤而怒批班「黃絲」︰「你哋快啲去死啦好無呀！門檻低到咁嘅抗爭都唔做！」
「黃絲」陣營嘅「五一團隊」日前喺fb大講佢哋「五一黃金周」嘅「好消息」，仲公佈咗個問咗12,513人嘅問卷調查，但入面唔少數據都睇到人嘩嘩聲。其中，喺問到啲人平均每星期到「黃店」幾多次時，竟有74.1%話「0次」，即大部分人都唔幫襯「黃店」，唔怪得之佢哋要搞咁多花招。
咁個「黃金周」有咩具體作用呢？根據呢個調查，受訪嘅12,513人入面，平均每人去咗4.5間「黃店」，平均消費咗537蚊，明明乘出嚟得670幾萬，但大會就好有底氣咁推算咗2億收入出嚟，真係又再「創造奇蹟」。但再睇返「黃金周」之前嘅數據，原來嗰陣啲人都平均消費400蚊，乜原來搞咁大壇嘢得少少分別？
雖然大會將呢堆數字形容為「好消息」、「反應熱烈」，但都有啲人睇到重點，就係其實多數人都唔幫襯「黃店」。「獨人」黎耀駿叫班人「去死」，唔少人亦留言問「幫襯有幾難呢」，黎耀駿就揶揄︰「難過網上俾（畀）嬲嬲，應該就好難。」
有人就問係全港市民定只係「黃絲」，黎耀駿好現實咁計，話就算用選舉條數計，當香港有45%人係「藍絲」，74.1%入面減走45%，都仲有29%人係「黃絲」而零幫襯，「嗰29（%）係咪食屎狗？」
廖偉濂：呢個數令我懷疑人生
「香港眾志」常委廖偉濂亦以同一數據，爆粗話「七成幾人一個禮拜都去唔到一次黃店wtx，呢個數令我懷疑人生。」
呢個時候又有「不分化」人跳出嚟，「Kin Cheung」話︰「我想知道『藍屍』會唔會×自己人唔幫襯？我只想『黃店』更多元化，更具競爭力，更多選擇同宣傳。」係囉，唔好鬧啦，家醜不外傳好啲嘅。 ■香港文匯報記者 甘瑜
