取悅「手足」究竟難定唔難,問問「黃店」「漁一海鮮火鍋料理」就知。話說佢哋開嘅新店「煲底海鮮火鍋料理」,為咗滿足一班「手足」,除咗隨處可見嘅「抗爭」標語,更畫咗幅有周梓樂、陳彥霖、「爆眼急救員」等「死傷者」嘅「打卡牆」。本來係想證明自己「真黃」,但點都冇諗到會俾「黃絲」大罵無良食「血饅」、消費死者,叫大家唔好幫襯。唔少「抗爭」得益者亦出面譴責,蟲泰(鄭松泰)就扮公道話:「你有想過那幾位離世子女的家人嗎?假如你有想過的話,你口中的牛(/人)肉如何嚥得下去?」如果蟲泰真係想讓牆上「手足」「沉冤得雪」,唔該講出「死亡」、「失蹤」同「爆眼」嘅真相喇。
牆上畫滿犧牲「手足」抽水
「煲底火鍋」嘅裝潢同餐牌設計可謂「一黃到底」,有「香港加油」嘅打卡燈板牆、食材上插着「香港加油」嘅黃底黑字牌,濕紙巾包裝都係黑底黃字。「抗爭」群像牆畫正中,係舊年不幸溺亡嘅陳彥霖及墮樓亡嘅周梓樂,畫中仲有太古廣場危企後墮樓亡嘅梁凌杰,及眼正流緊血嘅「爆眼急救員」等;當然亦唔少得「示威者」用遮抵抗嘅「經典場面」。城中唔少黃到爆嘅名人都去咗「煲底」慶賀開張,又喺「抗爭」群像打卡牆前開心合照。有網友將打卡照與菲律賓人質事件中,與彈痕纍纍、血迹斑斑嘅康泰旅遊巴合照嘅學生簧I一起,網民「Anita Wong」就話,「其實店家咁樣當烈士係布景板,同班菲律賓人有乜分別?」
一路食緊「抗爭」好處嘅「黃店」「渣哥一九九六」,亦開腔大罵「煲底」無良,「若非得到當事人或離世者家人親屬首肯,道德上應該無人有權可以咁做。」隨後又戴起頭盔話,若只係「無心之失」,只要盡快改正,相信大眾亦會接受。
fb「無神論者的巴別塔」亦出聲,雖然對「黃店」係咪食「人血饅頭」反而意見唔大,但「如果食飯果(嗰)陣要對住死咗、殘廢咗嘅『義士』點食得落口,咩天才先會諗得出將幅死人相掛響自己舖頭?食元寶蠟燭會唔會合理D(啲)。」
改名「煲底」騎劫「口號」
《熱血時報》嘅馬啟聰亦話死傷者面容當裝潢事小,但火鍋嘅煲底係爐火或電磁爐,「煲底」英文名「Meet At Pot」係咪當大家係食材,要約埋「一鑊熟」。社民連副主席周諾恆亦諷刺話:「第二屆鬥黃盃暫時由呢間店領先3個身位。其他參加者要加把勁啦。」
網民「Shek Vivian」亦喺「香港人的飲食購物天地」發帖大罵,叫大家唔好幫襯。「Chow Emilie」斥「煲底火鍋」騎劫「運動口號」,「咁以後我重(仲)應唔應該同『手足』講話(煲底見)?我驚佢地以為我約佢地去打邊爐喎?」
「連登仔」亦不滿「煲底火鍋」嗰幅牆,「上海仔」就將「煲底火鍋」比作開猶太人大屠殺紀念餐館,一如「貼哂(晒)集中營既海報出黎(嚟),仲賣集中營紀念套餐同仿毒氣飲品。」
而「煲底火鍋」卻扮盲睇唔到鬧爆評論,反而一有訂枱就立馬回覆「Confirm(確認)」,再次激怒眾「黃絲」網民。不過「煲底火鍋」尋就日跪低咗,發帖話正就牆畫布置收集意見,已經檢討,日內就會畀大家交代。
■香港文匯報記者 杜思文