有時真係唔知啲攬炒派死撐啲咩㗎。政制及內地事務局局長曾國衞日前講明唔可以用舊年區選嘅選民名冊去核對市民資料，否則就係犯法，但操控攬炒派「初選」嘅戴耀廷前日就小學雞地話會用「選舉事務處網站查證選民記錄的截圖」去查證市民嘅選民身份喎。事隔一日，戴耀廷噚日終於跪低承認咁做係唔得嘅，真係玩到班攬炒派支持者氹氹轉。
睇返戴耀廷前日仲喺facebook話要對曾國衞局長嘅言論作「嚴正聲明」，第一點就係「市民投票時，不會採用過去選舉的選民名冊。市民會自行提供住址證明、或過去的投票通知書、或選舉事務處網站查證選民記錄的截圖，來證明居民或選民身份」。
去到噚日，戴耀廷又出post話「因法律的原因」，承認係唔可以用上網查閱選民記錄嘅截圖嚟證明選民身份，於是就列咗N項其他選項畀攬炒派支持者，話畀佢哋知可以帶咩地址證明。
喂阿哥，今日投票啦喎，你𠵱家先講？唔少攬炒派支持者都感到無奈。「Page Lam」話︰「唉呀，實在太last min（最後一分鐘）先通知了......應該都宣傳唔切......」「Mayfly Hypatia」則質問︰「做咩要比（畀）個人資料你地（哋）呢啲零認受性的選舉集團睇？」「Law SF」就溫提︰「所有提供大量個人資料嘅人自己睇路。」 ■香港文匯報記者 甘瑜