■有攬炒派工會中人發帖，點名批評參加攬炒派初選的吳敏兒，並呼籲選民踢走「泛民」喎。 fb圖片攬炒派為搶奪立法會議席，以達成其攬炒目標，紛紛成立「工會」並登記成選民。有攬炒派工會中人近日發帖，點名批評參加攬炒派新界西初選的職工盟主席吳敏兒，狠批對方自稱職工盟喺嚿年6月「最先發動罷工」，但其實係「最早取消罷工」，而且在作決定前一班工會的組織幹事都不知情，「原來一個決定係由上而下壓落嚟？咁你又有幾重視連結返嚟個（嗰）班打工仔呀？」佢直指吳敏兒係靠「不斷舐下舐下新工會嘅『運動成果』就叫做咗野（嘢）」，所以「選民唔該全投抗爭派，踢走『泛民』」喎。■香港文匯報記者 陳川
一直同社民連關係密切嘅浸大社關成員黃雅文，日前喺fb發帖將矛頭對準吳敏兒。佢喺帖文中話，「原來真係有打工仔以為吳敏兒=工會戰線，實在太天真喇，（職）工盟根本就係工會路線的妥協派，......吳敏兒喺新西初選論壇講咗句『工會戰線不會觸及國安法』，我就知道，呢個人冇令我失望，如出一轍都係咁不思進取。」
「有幾重視連結返嚟班打工仔？」
黃雅文話，呢件事令佢諗返起去年6月，行政長官林鄭月娥撤回《逃犯條例》修訂，職工盟取消罷工一事，「你地（哋）有幾重視你既（嘅）組織對象大家有目共睹。吳敏兒被伍健偉喺論壇追擊時話『我哋最先發動罷工！』個事實係你地（哋）亦都係最早取消罷工，甚至落決定前連班工會嘅組織幹事都係睇live先知，（當日朝早，幹事們仲係到（喺度）『動員』緊工會罷工，又企喺街派單張『組織』人罷工，叫人send email比（畀）老細請sick leave。）原來一個決定係由上而下壓落嚟？咁你又有幾重視連結返嚟個（嗰）班打工仔呀？」
佢仲話，職工盟咁做嘅後果，係「每日喺公海見到大把手足講，因為參與『反送中運動』而罷工被炒，自己辭職全力貢獻比（畀）運動嘅人，工黨、職工盟一個都吸納唔到，因為佢地（哋）諗下都驚，又驚『運動』搞唔起，搞得起又驚其他人會壯大吞噬左（咗職）工盟。（之前叫過吳選區選，又要驚輸唔去選。）」
「舐『新工會』成果就當做咗嘢」
黃雅文狠批：「諗下都驚，驚完會縮嘅人，呢個時代佢無資格被推入去立法會做代議士。而（𠵱）家對家唔會同你傾，甚至會用不同罪名屈你，要你組織瓦解，入得去就要有坐監嘅準備、要有博（搏）鬥嘅決心。所以，唔該，唔好以為去開無限咁多個記招、一齊見下記者、不斷奶（舐）下奶（舐）下新工會嘅『運動成果』就叫做咗野（嘢）。其實唔該，呢到（度）再無你嘅事，你地（哋）可以行開。選民唔該全投抗爭派，踢走泛民。」
佢仲喺帖中標注「很喜歡二百萬三罷聯合陣線，喺我未想打野（嘢）前，佢已自推左（咗）三次吳敏兒不等於工會戰線」、「希望『新工會運動』繼續努力，唔好比（俾）職工盟左（阻）×住」等等字句。
王曉君力證 網民：一票不投
該帖文獲得不少攬炒派「自己友」的轉發，包括「勞工組」的王曉君，學聯前秘書長陳旻羲等轉發。王曉君仲留言力證吳敏兒有幾霸道：「 我冇睇論壇所以唔知佢（吳敏兒）嗰陣點樣講。但係文中寫組織幹事搞緊推動罷工，而吳敏兒有份由上而下call off，組織幹事係睇新聞先知取消，竟然咁唔尊重組織者，就完全無法接受。」
職工盟幹事杜振豪就出帖企圖向黃雅文還拖，話：「你對職工盟的批評，我都有不少係同意。但你自己做工會幹事的時候，又做了甚（什）麼厲害的政治化工運？當去年運動風風火火的時候，你又如何對待你跟開的工友？泥水佬造門，要過到人過到自己。」
前職工盟清潔服務業職工會組織幹事梁葉漢就反駁：「作為黃雅文的前同事，我自問有非常充分的理由去接受（黃雅文）這個提醒；而且支持永續職工盟既（嘅），唔只係職工盟既（嘅）現職同事既（嘅）專利。嗱好似勞工界選舉咁，要聽話自己屬會先有權出；話初選就話無需要同其他會協調咁職工盟萬歲！！」
「羅喬峰」亦話：「我唔想將矛頭指向職工盟體系，但回想過去一年，職工盟一直倡議工會戰線，又一直喺度縮，我覺得工運要靠職工盟可以收皮......一票不投吳敏兒！」