■黃絲被哄入股壹傳媒，昨日蝕到「一殼眼淚」。 facebook截圖壹傳媒創辦人黎智英日前涉嫌違反香港國安法被捕，一眾「黃絲」喺「獨」客嘅煽動下紛紛入股壹傳媒，聲稱以此表示自己「支持肥佬黎」，令股價日前飆升，搞到佢哋仲以為自己搞咗嗰全新「抗爭武器」。不過噚日隻股就跌到含含聲，於是班醒目「黃絲」又開啟「捉鬼」模式。以咁嘅思維學人炒股，唔怪得被人揶揄按照佢哋思路，噚日隻股大跌，即係「香港民主最黑暗嘅一日」咯。
高位沽貨賺錢者被罵為「鬼」
日前有班「獨」客喺fb專頁上不斷煲大買壹傳媒股票等於「支持肥佬黎」呢件事，包括「渾水」話自己已大手買入，「港獨」歌手何韻詩則稱「係咁意買咗幾手282」，叫人「支持肥佬黎」。隻股喺呢啲人吹奏下就突然爆升，搞到好多「黃絲」落疊。好嘞，高追嗰班今日即刻蝕到攤攤腰。有份叫人入股，但原來喺股價升到咁上下已經即時斬纜放咗嘅「渾水」，即刻被一眾「黃絲」放上「連登」「公審」，話佢說人買股，係「鬼」。
原名葉鍵濠嘅電台節目主持「健吾」睇唔過眼，話「渾水」「叫人買股票，身體力行，賺到錢＝鬼。歌手叫人買股票，都係買果（嗰）隻，自己有冇買唔知＝人......我只可以認真同大家講一句：信兒登，信呢d（啲）唔知咩人搞既group，你會死得不明不白」。
「渾水」當然有嘢講啦。佢主動開post回應事件，仲不忿何韻詩post like數高過自己，「無神論者巴別塔」嘅買入價低過自己，但自己卻被人圍攻，又話「大把人贏錢贏多過我，我都冇道德勒索佢哋叫佢哋嘔出嚟幫手足，做乜×呀我自願做多咗仲反而俾人×。」
網民諷「民主最黑暗一日」
「黃絲」見隻股票升咗就係香港「反抗有力」，輸咗就係有鬼。fb專頁「政治大嬸判」噚日就開post話，「尋（前）日連登仲講緊《從壹傳媒股價暴升，反映出香港人經濟實力好強》；彭博又話《反抗鎮壓股票成港人最新抗爭武器》......咁今（噚）日係唔係《香港民主最黑暗嘅一日》？」
■香港文匯報記者 鄭治祖