上季有兩場影相分勝負的判決惹起爭議，先有大摩的「南區寶」步步輸一步贏「駿爵士」、之後仲有大摩的「一代莊主」（圖上駒）奇蹟反先「明月昇輝」（圖下駒），好多心水清嘅馬迷，都話摩廄馬影相成日都影贏，唔係就經常有平頭情況出現。翻查紀錄，原來近三十年嘅平頭相，大部分都關大摩事，共有十匹咁多。當中有兩場跟「一代莊主」嘅情況差唔多，喺2016至17年馬季489總場次，大摩「美麗寶寶」跟蔡廄「魅力知友」鬥到難分難解，第一下感覺好似是「魅力知友」贏咗，但最終判平頭冠軍；另一場是2010至11年馬季192總場次，大摩「同一世界」跟新加坡短途王「火箭人」一齊壓線，肉眼睇前者好似輸咗，但慢鏡再睇番，有壓線王高雅志坐鎮的「火箭人」跟由白德民策騎的「同一世界」打成平手。最奇怪一樣嘢係「同一世界」在2007至08年馬季曾跟「最佳孖寶」亦鬥到被判平頭冠軍。不過講到最經典，一定係95年遮打盃告東尼騎住摩廄馬王「有性格」跟廄侶「開心人」配查汝誠，上演一場單打獨鬥的局面，當時由於「有性格」出頭過早拉士好似唔多，但告東尼臨壓線又將「有性格」打番上嚟，結果在呢場一級賽得平頭冠軍。